अदालतमा शिघ्र, शुलभ र स्वच्छ न्यायको अवधारणा : तिवारी

२८ असार, हेटौँडा । जिल्ला अदालत मकवानपुरका जिल्ला न्यायाधिश खडानन्द तिवारीले शिघ्र, शुलभ र स्वच्छ न्यायको अवधारणा अनुसार अदालत अघि बढेको बताउनु भएको छ । 
विहिबार पत्रकारहरुसंगको अन्तरक्रियामा बोल्दै उहाँले विगतको अवस्था भन्दा अहिले अदालतका काममा धेरै सुधार भएको बताउँदै अहिले अदालतलाई हेर्ने दृष्टिकोण समेत परिवर्तन भएको बताए । उहाँले मेलमिलाप पद्धतिमा जोड दिई दुबै पक्षको जितको अवस्था सिर्जना गर्नका लागि प्रयास भईरहेको बताए । यस अनुसार १ सय ५६ मुद्धामध्ये ३३ मा मिलापत्र भएको तिवारीले बताए ।
अदालतले महिनाको एक पटक न्यायाधिशसंग भेटघाट कार्यक्रम, निःशुल्क कानूनी सहायता प्रवाह, वैतनिक वकिलमार्फत कानूनी उपचारको व्यवस्था जस्ता सुविधाका कारण अदालती प्रक्रिया सहज हुँदै गएको उनले बताए । न्यायाधीश तिवारीले अहिले २ बर्ष नाघेका मुद्धा अदालतमा नरहेको भन्दै अब १८ महिनाभित्रै मुद्धा फैसलाको तयारी पनि गरिरहेको बताए । 
अन्तरक्रियामा न्यायाधिश स्वकृति पराजुली, धु्रबकुमार पिया, श्रेस्तेदार अनन्तराज मरासिनी, तहसिलदार मोहनप्रसाद ढुंगेल, वैतनिक अधिवक्ता कृष्णप्रसाद छत्कुली, जिल्ला बार एशोसियसनका अध्यक्ष अजमिर केसी लगायतको उपस्थिति रहेको थियो ।