कान्तिलोकपथको काम ४५ प्रतिशत सम्पन्न

४ असार, हेटौँडा । हेटौँडा–काठमाडौं जोड्ने छोटो दुरीको बैकल्पिक मार्ग कान्तिलोकपथको काम ४५ प्रतिशत सम्पन्न भएको छ । बहुबर्षिय ठेक्का प्रणालीमार्फत काम भईरहेको आयोजनाको जेठसम्ममा ४५ प्रतिशत काम सम्पन्न भएको आयोजनाले जनाएको हो । 

२०६५ सालदेखि ट्रयाक विस्तारको काम भईरहेको हेटौँडा–सातदोवाटो ९० किलोमिटरको सडकमा अहिले ९ वटा कम्पनीले काम गरिरहेका छन् । लोकपथ अन्तरगत ललितपुरको टिकाभैरव–सातदोवाटो ११ किलोमिटर सडक भने डिभिजन सडक कार्यालय ललितपुरले सम्पन्न गरिसकेको छ । अहिले हेटौँडा–चुच्चेखोला ७.३ किमि कन्ट्याक्ट प्रालि, कञ्चनजंगा गोल्डेन गु्रड (जेभि) ले चुच्चेखोला जितपुर भञ्ज्याङ १५.५ किमि, कन्टेक बानियाँ (जेभी) ले जितपुरभञ्ज्याङ–सिमात घुम्ति ८.५ किमि, अमर कन्स्ट्रक्सन प्रालिले सिमातघुम्ती–आलेभञ्ज्याङ ९ किमि, श्रेष्ठ मोतिदान बानियाँ (जेभी)ले आलेभञ्ज्याङ–बाग्मति १०.५ किमिमा काम गरिरहेका छन् । 

यसैगरी, दिवा हनुमान (जेभी) ले बागमति–काल्चेभिर ७ किमि, एसएल कम्पनि प्रालिले काल्चेभीर–छपेली ८ किमि, हनुमान कन्स्ट्रक्सन प्रालिले छपेली–तीनपाने भञ्ज्याङ ९ किमि र विरुवा कविर (जेभी) ले तीनपाने भञ्ज्याङ–टिकाभैरव ७ किमिमा काम गरिरहेका छन् । यी क्षेत्रमा सडक फराकिलो बनाउने, पर्खाल लगाउने, ग्राभेलिङ गर्ने र कालोपत्रेको काम भईरहेको आयोजनाका इन्जिनियर रमेश पाण्डेले बताए । 

२०७५ सालसम्म सम्पन्न गर्ने लक्ष्य राखेको आयोजनाको हेटौँडादेखि मकवानपुरगढीसम्म चालु आव ०७३/०७४ मै कालोपत्रे गरिने पाण्डेले बताए । ‘सडक विस्तारमा स्थानीय बासिन्दा र स्थानीय प्रशासनले समेत सहयोग गरेकाले काममा सहज भएको छ ।’–पाण्डेले भने–‘कामलाई गति दिन आयोजनाले निरन्तर निगरानी र सहजिकरण गरिरहेको छ, समयमै काम सम्पन्न गर्ने हाम्रो लक्ष्य छ ।’ आयोजना अन्तरगत हेटौँडा–१७ चुच्चेखोलाबाट कालोपत्रे गर्ने काम शुरु भएको छ । 

कामको गुणस्तरबारे स्थानीय समेत निगरानी गरेको हेटौँडा–१७ गैरीगाउँका यतिन्द्र पुडासैनीले बताए । सडक विस्तारले मकवानपुरका साथै देशकै आर्थिक एवं सामाजिक विकासमा टेवा पुग्ने मकवानपुरगढी–२ का बीरबहादुर गोले बताए । आयोजनाको कूल लागत २ अर्ब ५० करोड रहेको छ ।