डा. शंशाक कोइरालाद्धारा चार करोड बजेट सहित ५९ योजना सार्वजनिक

श्रीधर उपाध्याय

२४ पुस,गैँडाकोट ।संघीय सांसद क्षेत्र विकास कोष अन्तर्गत नवलपुर क्षेत्र नम्बर एकमा ५९ वटा योजना छनौट गरिएको छ । योजना छनौट गर्न सांसद विकास कोषमा प्रत्येक सांसद्का लागि रु चार करोड विनियोजन गरिएको हुन्छ । सोही विनियोजित रकम मध्ये नवलपुर क्षेत्र नम्बर एकमा ५९ वटा योजना छनौट गरिएको छ ।

नवलपुर क्षेत्र नम्बर एक अन्तर्गत गैँडाकोटमा १ करोड ४० लाखका २२ योजना, देवचुलीमा १ करोड १ लाखका १७ योजना, कावासोतीमा ८७ लाखका १३ वटा योजना, बुलिङ्टारमा ७० लाखका १७ योजना रहेका छन् । यस क्षेत्रमा अहिले सबै भन्दा बढी सडक पूर्वाधार तर्फ छुट्एिको छ । सडक पूर्वाधार तर्फ १ करोड ५४ लाख, सामुदायिक भवन निर्माणमा ७३ लाख, सिंचाईका क्षेत्रमा ३० लाख, सांस्कृतिक, पुरातात्विक भवन निर्माणका क्षेत्रमा ३६ लाख, सामुदायिक विद्यालय भौतिक पूर्वाधार तर्फ ५० लाख, खेलकुद क्षेत्रमा १० लाख, खानेपानी ढल निकास तर्फ १५ लाख, ग्रामिण विद्युतीकरण तर्फ २० लाख र अदुवा प्रशोधन केन्द्रका लागि १० लाख रकम छुट्याइएको छ ।

गैँडाकोट नगरपालिका अन्तर्गत गैँडाकोटमा सडक पूर्वाधार तर्फ ५० लाख, सामुदायिक सभागृह निर्माण तर्फ १४ लाख, सिंचाई तर्फ १० लाख, सांस्कृतिक पुरातात्विक तथा पर्यटन तर्फ २० लाख, सामुदायिक विद्यालयको पूर्वाधारतर्फ ३६ लाख र खेलकुद क्षेत्रमा १० लाख रकम विनियोजन गरिएको छ ।

देवचुली नगरपालिका तर्फ खानेपानी तथा ढल निकास तर्फ १५ लाख, सडक पूर्वाधार तर्फ ५० लाख, सामुदायिक सभागृह निर्माणतर्फ २६ लाख, सिंचाई तर्फ १० लाखका योजना छनोट गरिएको छ । कावासोती नगरपालिकामा सामुदायिक सभागृह निर्माण तर्फ ३३ लाख, सांस्कृतिक, पुरातात्विक तथा पर्यटनतर्फ १६ लाख, सडक पूर्वाधार तर्फ २४ लाख, सामुदायिक विद्यालयको भौतिक पूर्वाधारतर्फ १४ लाख रहेको छ ।

बुलिङटार गाउँपालिका तर्फ बुलिङटारमा अदुवा प्रशोधन केन्द्र निर्माणका लागि १० लाख, सिंचाई कुलो निर्माणका लागि १० लाख, सडक पूर्वाधार तर्फ ३० लाख, ग्रामिण विद्युतीकरण तर्फ २० लाखका योजना रहेका छन् ।

नवलपुर एक नेपाली काँग्रेसका महामन्त्री समेत रहनुभएका डा. कोइरालाको क्षेत्र हो । कोइरालाका यसै क्षेत्रबाट तीन पटक निर्वाचित भइसक्नुभएको छ । तीन तीन पटक निर्वाचित भइसक्दा पनि यस क्षेत्रका लागि प्रयाप्त काम गर्न नसकेको कोइरालालाई आरोप लाग्ने गरेको छ ।