धरौटी तारेखमा छुटे शिवम निर्देशक मारु

८ मंसिर, हेटौँडा । अवैध ढंगबाट खानी उत्खनन गरेको अभियोगमा पक्राउ परेका शिवम् सिमेन्ट्स लिमिटेडका निर्देशक रघुनन्दन मारु धरौटी तारेखमा रिहा भएका छन् । 
जिल्ला अदालत मकवानपुरले मागेको धरौटी बुझाएपछि उनी तारेखमा छुटेका हुन् । जिल्ला वन कार्यालय मकवानपुरले ३७ लाख ६० हजार रुपैयाँ बिगो दाबिसहित शुक्रबार अदालतमा मुद्धा पेश गरिएकोमा ७ लाख ५५ हजार धरौटी लिई तारेखमा रिहा गर्ने आदेश भएको थियो । जिल्ला न्यायाधीश खडानन्द तिवारीको एकल इजलासले धरौटी मागी तारेखमा छोड्ने आदेश दिएका मारुले धरौटी बुझाएपछि रिहा भएको अदालतका श्रेष्तेदार अनन्त मरासिनी बताए । 
उनलाई साविकको सुकौरा र ठिंगन गाविसमा रहेको चपकी ढुङ्गा खानी अबैध रुपमा उत्खनन गरेको भन्दै पक्राउ गरी अदालत पेश गरेको थियो । खानी उत्खनन गर्नका लागि खानी विभागसँग स्वीकृति लिएभन्दा बढी उत्खनन गरिएकाले कार्तिक २८ गते पक्राउ गरी हिरासतमा राखिएको जिल्ला वन कार्यालय मकवानपुरका प्रमुख राजेन्द्रप्रसाद न्यौपानेले बताए ।
शिवमले संचालनमा गरेको खोटार खानी समेत स्विकृति लिए भन्दा फरक स्थानमा रहेको जनाईएको छ । जिल्ला वन कार्यालय र क्षेत्रीय वन कार्यालयले निरन्तर अनुगमन गरेपनि कारवाही नहुँदा त्यस क्षेत्रका स्थानीयले दुबै कार्यालय समेत आर्थिक मोलमोलाईमा संलग्न भएको आशंका गरेका थिए । स्थानीयले खोटारसहितका अन्य खानीको बारेमा समेत अनुसन्धान गर्न सम्बन्धित निकायलाई आग्रह गरेका छन् । वन कार्यालयले नियमित अनुगमन गर्न थालेपछि शिवमले स्थानीय संचारमाध्यमलाई प्रभावित गर्न ३ हजार रुपैँयाको विल पेश गरेर भुक्तानी लिन फोन गरेको थियो ।
विगतमा स्थानीय संचारमाध्यमलाई वेवास्ता गर्ने शिवमले विज्ञापन नै प्रकाशन, प्रशारण नगरी विल मागेपछि शिवमले कुनै कालो कर्तुत लुकाउन संचारमाध्यमलाई प्रयोग गर्न खोजेको भन्दै धेरै संचारमाध्यमहरुले विल पेश गरेका थिएनन् ।