पूर्व विजेतलाई टाइब्रकरमा रोक्दै रुस विश्वकपको क्वार्टरफाइनलमा

१८ असार, हेटौँडा । पूर्व विजेता स्पेनलाई पेनाल्टी शुटआउटमा हराउँदै आयोजक रुस इतिहासमै पहिलो पटक विश्वकप फुटबलको क्वार्टरफाइनलमा प्रवेश गरेको छ ।
स्पेनलाई पेनाल्टी शुटआउटमा ४–३ गोलअन्तरले हो । नियमित र अतिरिक्त समयमा १–१ गोलको बराबरी भएपछि खेलको निर्णय पेनाल्टीमा लिइएको हो ।
रुसको जितमा नायक बनेका गोलरक्षक इगर अकिनफिभले स्पेनका कोके र इयागो आसपासको प्रहार रोकेका थिए । स्पेनका लागि आन्द्रेस इनिएष्टा, सर्जियो रामोस र पिकेले मात्रै गोल गरे । यस्तै रुसका लागि फ्योदोर स्मोलोभ, सेर्जेई इग्सानेभिच, अलेक्जान्दर गोलोभिन र डेनिस चेरिसेभले गोल गरे ।
खेलको १२औं मिनेटमै उपहार गोलमार्फत स्पेनले अग्रता लिएको थियो । स्पेनको प्रहार जोगाउने क्रममा रुसका सेर्जेई इग्सानेभिचले दुर्भाग्यवस आफ्नै पोष्टमा गोल गरेका थिए ।
खेल अवधिभर ७० प्रतिशत बल पोजिसन बनाएको स्पेनले ४१औं मिनेटमा पेनाल्टीमा गोल खान पुग्यो । जेरार्ड पिकेले डिबक्सभित्र ह्याण्ड गरेपछि पाएको पेनाल्टी अवसरलाई अर्तेम ज्युवाले गोलमा परिणत गरे ।
रुस पहिलो पटक विश्वकपको क्वार्टरफाइनलमा प्रवेश गरेको हो । सन् १९९० मा सोभियत युनियन टुक्रिए यता रुसले चौथो विश्वकप खेलेकोमा पहिलो पटक नकआउट चरणमा पुगेको हो ।
(एजेन्सी)