मेयर महतद्वारा होटल उद्घाटन

१० साउन, हेटौंडा । हेटौंडा-१० टिसिएन रोडमा संचालनमा आएको सुविधा सम्पन्न होटलको हेटौँडाका मेयर हरिबहादुर महतले बुधबार उद्घाटन गरेका छन् । 
तीन तारे होटलको अवधारणासहित संचालनमा आएको 'होटल प्रकाश' को मेयर महतले उद्घाटन गरेका हुन् । कार्यक्रममा बोल्दै महतले हेटौँडालाई समृद्ध र ठूलो शहरको रुपमा विकास गर्ने प्रतिवद्धता व्यक्त गरेका छन् । उनले सबै मिलेर अघि बढ्न सके हेटौँडाको विकास सम्भव रहेको भन्दै साझेदारीका लागि आव्हान गरे ।
३५ करोड रूपैयाँको लागनी रहेको होटल ३ कठ्ठा क्षेत्रफलमा बनेको ५ तल्ले होटलमा अहिले २७ कोठा छन् । कोठाको संख्या बढाएर ६० पुर्याउने लक्ष्य रहेको प्रवन्धक राजेन्द्रप्रसाद श्रेष्ठले बताए । उनका अनुसार होटलमा एउटा बार र एउटा फाष्ट फुड रेष्टुरेन्ट छ । होटलमा तालिम, भेला, अन्तरक्रिया लगायतका कार्यक्रम गर्नका लागि १२० सिट क्षमताको एउटा र २५ सिट क्षमताको एउटा हल रहेको छ । होटलमा स्विमिङ पुल समेत रहने जनाइएको छ ।
होटलका संचालक रवि गुप्ताले आफुहरु यसअघि यातायात क्षेत्रमा सक्रिय रहेको बताउँदै पर्यटन क्षेत्रको प्रवर्द्धनका लागि होटलमा लगानी गरेको बताए । पूर्व-पश्चिम राजमार्गमा पर्ने हेटौंडामा पर्यटकको बसाई आरामदायी बनाउन होटलले सहयोग गर्ने उनको भनाई छ ।