वनलाई उद्योग र पर्यटनसंग जोड्नुपर्छ : मन्त्री नेपाल

२५ भदौ, हेटौँडा । प्रदेश ,नम्बर ३ का उद्योग पर्यटन बन तथा वातावरण मन्त्री अरुण नेपालले वनलाई उद्योग, पर्यटन क्षेत्रसँगै आर्थिक, सामाजिक, साँस्कृतिक पक्षसँग जोड्नुपर्ने बताएका छन् ।

आदिवासी जनजाति समुदायका लागि लक्षित अनुदान संयन्त्र सम्बन्धी प्रदेश ३ को हेटौंडामा सोमबारबाट शुरु भएको २ दिने प्रादेशिक गोष्ठीमा बोल्दै उनले उत्पादनमुलक फलफूलको विरुवारोपण र विकासमा जोड दिनुपर्ने बताए । वनले जनताको जीवनलाई उकास्नेतिर सोच्नुपर्नेमा जोड दिदै उनले बन संरक्षण गरे बापत् विश्व बैंकले दिने रकमले जनतामा आउने ठोस परिवर्तनबारे पहिल्यै टुंगो लाग्नुपर्ने बताए ।  

कार्यक्रममा आदिवासी जनजाति अनुसन्धान तथा विकास केन्द्रका अध्यक्ष डा. पासाङ्ग शेर्पाले विश्व बैंक मार्फत् नेपालले अनुदान र ऋण गरी करिब २ अर्ब ४० करोड रुपैंया प्राप्त गर्ने बताए । विश्व बैंकले दिने रकमबाट पाँच वटा परियोजना तयार भईरहेको जानकारी दिदै रेड कार्यान्वयन केन्द्र, काठमाडौंका उपसचिव अजय मानन्धरले अर्थ मन्त्रालयले स्वीकृत गरी सकेको समेत जानकारी दिए । विश्व बैंकले दिने २ अर्ब ४० करोड रुपैंयामध्ये २५ प्रतिशत मात्र अनुदान रकम हुने र बाँकी रकम सहुलियत दरको ऋण हुने समेत उनको भनाई छ ।

कार्यक्रममा नेपाल आदिवासी जनजाति महासंघका उपाध्यक्ष लोकबहादुर दुरा, सामुदायिक बन उपभोक्ता महासंघका उपाध्यक्ष भीमप्रकाश खड्का, महासंघकी महासचिव भारती पाठक, नेपाल नगरपालिका महासंघका कोषाध्यक्ष घनश्याम पाण्डे, डिभिजन बन कार्यालय मकवानपुरका प्रमुख प्रल्हाद धिताल, नेपाल पत्रकार महासंघ तीन नम्बर प्रदेशका अध्यक्ष प्रताप बिष्ट, सामुदायिक बन उपभोक्ता महासंघ मकवानपुरका अध्यक्ष साधुराम चौलागाई लगायतले मन्तव्य व्यक्त गरेका थिए ।
कार्यक्रम सामुदायिक बन उपभोक्ता महासंघका प्रदेश नम्बर ३ अध्यक्ष विनोद न्यौपानेको अध्यक्षतामा शुरु भएको थियो ।