विनियोजन विधेयकको प्राथमिकतामाथिको छलफल सम्पन्न

४ जेठ, हेटौँडा । आर्थिक मामिला तथा योजनामन्त्री कैलाश ढुंगेलले ३ नम्बर प्रदेशसभा बैठकमा प्रस्तुत गरेको विनियोजन विधेयक ०७५÷०७६ को सिद्धान्त र प्राथमिकता (कर प्रस्ताव बाहेक) माथिको छलफल शुक्रबार सकिएको छ । 

शुक्रबारको छलफलमा भाग लिंदै प्रदेशसभा सदस्यहरुले ३ नम्बर प्रदेश संघीय राजधानी भएको प्रदेश भएकाले अन्य प्रदेशलाई उदाहरण प्रस्तुत गर्ने ढंगले नीति तथा कार्यक्रम ल्याउनुपर्नेमा जोड दिएका थिए । उनीहरुले प्रादेशिक शिक्षा आयोग, प्रादेशिक लोकसेवा आयोग, प्रादेशिक विज्ञान प्रतिष्ठान, प्रादेशिक प्राविधिक शिक्षा लगायतका दिर्घकालिन प्रभाव पार्ने योजनामा काम गर्नुपर्नेमा जोड दिएका थिए ।

उत्पादन र निर्यातमुलक उद्योगलाई प्रवद्र्धन, कम्तिमा ६६ निर्वाचन क्षेत्र र १३ जिल्लामा एउटा महत्पूर्ण योजना छनौट लगायतका विषयमा ध्यान दिन उनीहरुले सुझाव दिए । छलफलमा प्रदेशसभा सदस्यहरु मुनु सिग्देल, नरोत्तम बैद्य, न्हुच्छेमान श्रेष्ठ, विराजभक्त श्रेष्ठ, विजुला बर्मा, रिना गुरुङ, रिता माझी, बुद्धिमान माझी लगायतले प्रदेश सरकारको नीति तथा कार्यक्रमले समृद्धिको खाकालाई अमूर्त रुपमा भन्दा पनि ठोस ढंगले प्रस्तुत गर्नुपर्नेमा जोड दिएका थिए । सभामा उठेका प्रश्नहरुको जवाफ दिंदै मन्त्री ढुंगेलले सुझावलाई समेट्ने प्रतिवद्धता व्यक्त गरे । उनले प्रदेशका सम्पूर्ण राजनीति दलका घोषणा पत्र र सहश्राव्दी विकास लक्ष्यमा उल्लेख भएका विषयबस्तुलाई केन्द्रमा राखेर नीति तथा कार्यक्रम आउनेमा ढुक्क हुन आग्रह गरेका थिए ।

यता, प्रदेशसभामा शुक्रबार प्रदेशसभा सदस्यहरुले धारणा राख्दै हिड्न थालेपछि प्रदेशसभा बैठकका कुर्सीहरु खालि भएका थिए ।  विनियोजन विधेयक माथि धारणा राख्ने विभिन्न दलका प्रदेशसभा सदस्यहरु हिड्न थालेपछि गणपुरक संख्या नपुग्ने देखिएको थियो । गणपुरक संख्या नै नपुग्ने देखिएपछि सबै दलका प्रमुख सचेतक र सचेतकहरुले बैठकमा बाँकी रहेका प्रदेश सदस्यहरुलाई नबाहिरिन आग्रह गरेका थिए । आगामी दिन यस्तो हुन नदिने नेकपा एमालेका प्रमुख सचेतक रामेश्वर फुँयालले प्रतिक्रिया दिए ।