रिट्वीट र फलो गर्दा पैसा 

२९ पुष, हेटौंडा । जापानका एक अर्बपतिले ट्वीटरमा आफ्ना एक हजार फलोअरलाई ९० लाख डलर बाँडेका छन् । पैसाले मान्छेको जीवनमा कति खुसी ल्याउन सक्छ भन्ने परीक्षण गर्न उनले त्यस्तो गरेको बताइएको छ ।
पैसा प्राप्त गर्न ट्वीटर प्रयोगकर्ताले केबल उनलाई फलो र रिट्वीट गर्नुपर्ने थियो । यसमा सबैलाई जनवरी ७ को मध्यरातसम्ममा ट्वीट रिट्वीट गर्न भनिएको थियो ।
अनलाइन सपिङका मोगुल भनेर चिनिने युसाकु मेइजावाले अघिल्लो हप्ता मात्र १ ट्वीटरका एक हजार प्रयोगकर्तालाई १ अर्ब येन अर्थात ९० लाख डलर, बाँड्ने घोषणा गरेका हुन् जसमा प्रत्येकले ९ हजार डलरसम्म प्राप्त गर्नेछन् । 
युट्युबमा यसबारे घोषणा गर्दै युसाकुले यसलाई अत्यन्तै गम्भीर सामाजिक परीक्षणका रुपमा लिदै पैसाले मान्छेको जीवनमा कस्तो परिवर्तन ल्याउन सक्छ र कसरी प्रभाव पार्छ भन्ने सम्बन्धी अध्ययन गर्न सकिने उल्लेख गरेका छन् ।
उक्त भिडियोमा उनले सबै विजेताहरुले आफूले पाएको पैसा जेसुकैमा पनि खर्च गर्न सक्ने बताएका हुन् । 
तर उनीहरुले केकसरी प्रयोग गरे र त्यसले तिनको जीवनमा कति फरक पार्यो भन्नेबारे सामान्य प्रश्नहरुको जवाफ चाहिँ दिनुपर्ने शर्त राखेका छन् । 
युसाकुले २०१९ को सुरुवातमा पनि यस्तै किसिमको प्रतियोगिता राखेका थिए जसमा उनले १०० जना ट्वीटर प्रयोगकर्तालाई ९ लाख १४ हजार डलर प्रदान गर्ने वचन दिएका थिए । र अन्त्यमा प्रत्येकले उनीबाट नौ हजार डलर प्राप्त गरेका थिए । 
त्यतिबेला उनले सबैभन्दा बढी रिट्वीट भएको ट्वीटको नयाँ रेकर्ड कायम गरेका थिए जसमा उनको ट्वीट ४६ लाख ८० हजारपटक रिट्वीट भएको हो ।