वन डढेलो नियन्त्रणबारे अन्तरक्रिया

२ चैत, हेटौडा । जिल्ला वन कार्यालय मकवानपुरको आयोजनामा बुधबार हेटौँडामा वन डढेलो नियन्त्रणसम्बन्धी अन्तरक्रिया सम्पन्न भएको छ । वन डढेलो व्यवस्थापन जनचेतना सप्ताहव्यापी कार्यक्रम अन्तरगत सरोकारवालाहरुसंग अन्तरक्रिया सम्पन्न भएको हो । 
कार्यक्रममा जिल्ला वन कार्यालयका सहायक वन अधिकृत विशाल भट्टराईले जिल्लाको वन डढेलोको अवस्था र नियन्त्रणका लागि कार्यालयले गरेको कामबारे प्रस्तुति गरेका थिए । त्यस्तै, वन विशेषज्ञ किरण तिमल्सिनाले विश्वव्यापी वन डढेलो, प्राविधिक पक्ष, सूचना प्रविधिको प्रयोग, रणनीति, डढेलो नियन्त्रणमा अपनाउनुपर्ने सावधानी लगायतका विषयमा प्रस्तुतिकरण गरेका थिए । 
मकवानपुरका प्रमुख जिल्ला अधिकारी गणेश शर्मा दुवाडीको प्रमुख आतिथ्यता एवं जिल्ला वन अधिकृत राजेन्द्र न्यौपानेको अध्यक्षतामा भएको कार्यक्रममा वन कार्यालयका कर्मचारी, गैसस मकवानपुर, सामुदायिक वन उपभोक्ता महासंघ, वन सम्पदा उपभोक्ता राष्ट्रिय महासंघ, सुरक्षा निकाय, सरकारी कार्यालयका प्रमुख, संचारकर्मी लगायतको सहभागिता रहेको थियो । 
सप्ताहव्यापी कार्यक्रम अन्तरगत सचेतनामुलक अन्तरक्रिया, र्याली, गोष्ठी लगायतका कार्यक्रम गर्ने सहायक वन अधिकृत भट्टराईले बताए ।