सूचनाको हक कार्यान्वयनका लागि अन्तरक्रिया

१० साउन, हेटौँडा । मकवानपुरका सार्वजनिक निकायबाट सूचनाको हक कार्यान्वयन हुन नसकेको सोमबार हेटौँडामा आयोजित कार्यक्रमका सहभागीले बताएका छन् ।

सूचनाको हक कार्यान्वयनका लागि नागरिक तहबाट दवाव सिर्जना गर्नुपर्ने उद्देश्यका साथ भएको कार्यक्रममा सहभागी संचारकर्मी, व्यवसायी र सर्वसाधारणले सूचनाको हक कार्यान्वयन गराउन एकतावद्ध भएर अघि बढ्नुपर्ने खाँचो औल्याए । कार्यक्रममा बोल्दै सूचना हक कार्यान्यवनका लागि गठित जिल्ला अनुगमन समितिका संयोजक एवं मकवानपुरका सहायक प्रमुख जिल्ला अधिकारी हरि पन्तले सार्वजनिक निकाय सूचनाको हक कार्यान्वयनमा उदासिन रहेको स्विकारे । उनले सुशासनका लागि पारदर्शिता आवश्यक रहेको र सूचनाको हकले पारदर्शितामा जोड दिएकाले यसको कार्यान्वयनमा जुट्नुपर्ने बताए । उनले सार्वजनिक निकायको सूचनाको हक कार्यान्वयनको अवस्थाबारे आफुहरुले अनुगमन गर्ने बताए ।

कार्यक्रममा सूचनाको हक कार्यान्वयन नागरिक अभियानका संयोजक कुमार अधिकारी, नेपाल पत्रकार महासंघ मकवानपुरका उपाध्यक्ष गिरिजा अधिकारी, सचिव कृष्ण सारु मगर, प्रेस युनियन मकवानपुरका अध्यक्ष रुपेश दुलाल, व्यवसायी कृष्णराज कोइराला लगायतले सूचनाको हक कार्यान्वयनमा जिल्लाका सार्वजनिक निकाय उदासिन रहेको बताए ।