कोरोना कहरः विश्वभर २७ हजार भन्दा बढीको मृत्यु

१५ चैत्र, हेटौंडा । विश्वमा महारामारीको रुपमा तीब्र गतिमा फैलिरहेको कोरोना भाइरस अर्थात कोभिड–१९ को संक्रमणबाट मृत्यु हुनेको संख्या २७ हजार नाघेको छ ।
यो समाचार तयार पार्दासम्म पछिल्लो २४ घण्टामा कोरोना संक्रमणबाट विश्वभर ३ हजार २६८ जनाको मृत्यु भएको छ  भने ६४ हजरा १५६ जना नयाँ संक्रमित भएका छन् ।
विश्वभर ५ लाख ९६ हजार २१ जना संक्रमित भएकामा २७ हजार ३४१ जनाको मृत्यु भइसकेको छ । यस्तै १ लाख ३३ हजार ५७ जना उपचारपछि घर फर्किएका छन् । 
चीनबाट सुरू भएको कोरोनाको संक्रमणबाट अहिले संक्रमित र मर्नेको संख्या चिनमा भन्दा युरोपमा बढी भएको छ । भने संक्रमित हुने क्रम अमेरिकामा बढेको छ । पछिल्लो २४ घण्टामा १८ हजार ३६३ जना नयाँ संक्रमित व्यक्ति थपिएसागै अमेरिकामा संक्रमितको संख्या १ लाख ३ हजार ७९८ जना पुगेको छ ।
सबैभन्दा धेरै मानिसहरुको मृत्यु इटालीमा भएको छ । पछिल्लो २४ घण्टामा थप ९सय १९ जनाको मृत्यु भएपछि त्यहाँ कोरोनाको संक्रमणबाट मृत्यु हुनेको संख्या ९ हजार १ सय ३४ पुगेको छ । हाल ८६ हजार ४ सय ९८ जना सङक्रमित रहेको इटालीमा १० हजार ९५० जना उपचारपछि घर फर्किएका छन् ।
स्पेनमा पनि मृत्यु हुनेको संख्या बढिरहेको छ । त्यहां थप ७ सय ७३ जनाको मृत्यु भएपछि मृतकको संख्या ५ हजार १३८ पुगेको छ । ९ हजार भन्दा बढी उपचार पछि निको भएका छन् । 
यसैगरी जर्मनी, फ्रान्स, बेलायत, स्विटजरल्याण्ड लगाएतका देशमा संक्रमित र मृत्युहुनेको संख्या बढीरहेको छ ।  
यता मध्यपूर्वका राष्ट्रहरुमध्ये इरानमा कोरोनाको संक्रमणको कारण २ हजार ३३७ जनाको मृत्यु भएको छ भने  ३२ हजरा बढी संक्रमित छन् ।
कोरोना भाइरसको संक्रमणबाट अहिलेसम्म १९९ राष्ट्र प्रभावित भएका छन् ।