कोरोना कहरः विश्वभर मृतकको संख्या १ लाख नाघ्यो 

२९ चैत्र, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) को संक्रमणबाट मर्नेको संख्या १ लाख नाघेको छ ।
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार एकैदिन थप ७ हजार ९ जनाको मृत्यु भएको छ । यो संगै कोरोना संक्रमणका कारण मर्नेको संखया १ लाख नाघेको हो । 
अहिलेसम्म कोरोना संक्रमणबाट कुल १ लाख २ हजार ६ सय ९२ पुगेको छ भने विश्वभर १६ लाख ९७ हजार ८ सय २ जना मानिस संक्रमित भएका छन् । पछिल्लो २४ घण्टामा मात्रै ९४ हजार १ सय ८ जना नयाँ कोरोना संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ३ लाख ७६ हजार १ सय ८४ जना उपचारपछि निको भएका छन् ।
यस्तै भाइरसका संक्रमणका कारण अहिले ४९ हजार ८ सय ३१ जना गम्भीर अवस्थामा उपचार गराइरहेका छन् भने ११ लाख ६९ हजार ९४ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु इटालीमा भएको छ । इटलीमा अहिलेसम्म १८ हजार ८ सय ४९ जनाले ज्यान गुमाएका छन् । यो संख्या विश्वकै सबैभन्दा बढी हो । 
इटालीमा पछिल्लो समय ५ सय ७० जना मृतक थपिएका छन् भने  ३ हजार ९ सय ५१ जना नयाँ संक्रमित थपिएका छन् । 
यता पछिल्लो समय कोरोना भाइरसको इपिसेन्टर बनिरहेको अमेरिकामा एकै दिन २ हजार ४३ जनाको मृत्यु भएको छ । यो सँगै अमेरिकामा ज्यान गुमाउँनेको संख्या १८ हजार ७ सय २५ पुगेका छ । यो सँगै अमेरीका संक्रमणबाट मृत्युहुनेको दोश्रो स्थानमा उक्लिएको छ । यस अघि इटाली पछि सबैभन्दा बढी मानिसको मृत्यु स्पनेमा भएको थियो ।
विश्वको सबैभन्दा बढी संक्रमित रहेको अमेरिकामा एकैदिन ३३ हजार ७ सय ५२ जना नयाँ संक्रमित थपिएपछि यहाँ ५ लाख २ हजार  ३ सय १८ जना संक्रमित पुगेको छन । 
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या १६ हजार ८१ पुगेको छ । स्पेनमा पछिल्लो २४ घण्टामा ६ सय ३४ जना थप मानिको मृत्यु भएको छ भने ५ हजार ५१ जना नयाँ संक्रमित थपिएका छन् ।
यसैगरी लगातार मृतक र नयाँ संक्रमित बढिरहेको फ्रान्समा पछिल्लो २४ घण्टामा ९ सय ८७ जनाले ज्यान गुमाएपछि यहाँ मर्नेको संख्या १३ हजार १ सय ९७ पुगेको छ । यहाँ संक्रमितको संख्या १ लाख २४ हजार ८ सय ६९ पुगेको छ । फ्रान्समा पछिल्लो २४ घण्टामा ७ हजार १ सय २० जना नयाँ संक्रमित थपिएका छन् । 
यसैगरी कोरोना भाइरसको संक्रमणबाट बेलायतमा ड हजार ९ सय ५८ जनाको मृत्यु भएको छ । यहाँ पनि पछिल्लो समयमा मृतकको संख्यामा बृद्धि भइरहेको छ । बेलायतमा एकैदिन थप ९ सय ८० जनाको मृत्यु भएको छ । 
यसैगरी मध्यपूर्वी एसियाली मुलुक इरानमा ४ हजार २ सय ३२, बेल्जियममा ३ हजार १९, जर्मनीमा २ हजार ७ सय ६७, र नेदरल्याण्डसमा २ हजार ५ सय ११, ब्राजिलमा १ हजार ६८ र स्विटजरल्याण्डमा १ हजार २ जनाले ज्यान गुमाएका छन् ।
कोरोना भाइरसको उदगमस्थन चीनमा भने नयाँ संक्रमित र ज्यान गुमाउनेको संख्या स्थिर बनेको छ । यहाँ अहिलेसम्म ३ हजार ३ सय ३६ जनाले ज्यान गुमाएका छन् । वितेको २४ घण्टामा चीनमा थप १ जनाको मृत्यु भएको छ ।