एमालेको चुनावी घोषणा पत्र सार्वजनिक

१८ बैशाख, काठमाडौं । नेकपा एमालेले पार्टी कार्यालय धुम्बाराहीमा स्थानीय तहको चुनावका लागि पार्टी घोषणापत्र सार्वजनिक गरेको छ । एमालेले उपाध्यक्ष वामदेव गौतमको अध्यक्षतामा गठन भएको समितिले तयार पारेको घोषण पत्र अध्यक्ष केपी शर्मा ओलीले सार्वजनिक गरेका हुन् ।

एमालेले आफ्नो घोषणापत्रमा विकास र समृद्धिका योजनालाई बढी प्राथमिकतामा राखेको जनाएको छ । एमालेले घोषणापत्रमा ०५१ सालको मनमोहन अधिकारी र २०७२ सालको केपी ओली सरकारले ल्याएका अधिकांश कार्यक्रमलाई पुनस् निरन्तरता दिएको छ । ओली सरकारका कतिपय महत्त्वाकांक्षी योजनालाई पार्टीले पुनस् लिपिबद्ध गरेको छ ।
घोषणापत्रमा मनमोहन सरकारका ‘आफनो गाउँ आफै बनाऔं’, ‘९ स को अभियान’ र ‘सामाजिक सुरक्षा भत्ता’ लगायतका कार्यक्रमलाई थप प्रभावकारी बनाउने उल्लेख छ भने ओलीले ल्याएका आत्मनिर्भर अर्थतन्त्रका नारालाई पुनस् जोड दिएको छ ।
एमालेले आगामी १० वर्षपछि नेपाली जनताको प्रतिव्यक्ति आम्दानी १० हजार अमेरीकी डलर भन्दा बढी हुने प्रक्षेपण गरेको छ ।
घोषणापत्रमा सबै महासागरहरुमा नेपाली ध्वजावाहक पानी जहाज चलाउन जलमार्ग विकास गर्ने ठोस निष्कर्षमा पुगेको जनाएको छ ।
घोषणा पत्रमा राष्ट्रिय र अन्तर्राष्ट्रिय क्षेत्रका सम्भव श्रोत र साधन परिचालित गरी आगामी १० वर्षमा नदी प्रवाह प्रणालीबाट १० हजार, जलाशययुक्त परियोजनाबाट २५ हजार, जैविक ऊर्जाबाट करिव १० हजार, हाइड्रोजन ऊर्जाबाट करिव १० हजार र सौर्य ऊर्जाबाट करिव २ हजार गरी जम्मा करिव ५७ हजार मेगावाट विद्युत् उत्पादन गर्ने उल्लेख छ ।
एमालेले आफ्नो सरकार निर्माण भए आगामी १० वर्षमा दैनिक ५ लाख यात्रीहरु आवतजावत गर्ने गरी हवाइ यातायात सेवाको संरचना विकास गर्ने जनाएको छ ।