नेविसंघ मकवानपुरको अधिवेशन साउन २० गते

१२ साउन, हेटौँडा । नेपाल विद्यार्थी संघ मकवानपुरको जिल्ला अधिवेशन साउन २० गते हुने भएको छ । अधिवेशन तयारीका लागि बुधबार भएको बैठकले साउन २० गते अधिवेशन गर्ने निर्णय गरेको हो । 
नेपाली काँग्रेस मकवानपुर र नेविसंघ मकवानपुरका पदाधिकारीसहितको बैठकले वन विज्ञान अध्ययन संस्थानको सभाहलमा अधिवेशन गर्ने निर्णय गरेको जिल्ला अध्यक्ष महेन्द्र राउतले बताए । यसअघि नै क्षेत्रीय भेला सम्पन्न भई प्रतिनिधि छनौट भएकाले जिल्ला अधिवेशनमात्रै हुने उनले जानकारी दिए । १ सय ६० प्रतिनिधि सहभागी हुने अधिवेशनले अध्यक्ष, उपाध्यक्ष, सचिव, कोषाध्यक्ष, सहसचिवसहित १५ सदस्यीय नयाँ कार्यसमिति चयन गर्नेछ । जिल्ला भेलाका लागि नेविसंघले सूर्य थापालाई केन्द्रिय प्रतिनिधि तोकेको छ । 
बैठकले आवास व्यवस्थापन उपसमिति संयोजकमा यादव अर्याल, स्वागत तथा मञ्च व्यवस्थापनमा टेकनाथ शिवाकोटी, प्रचारप्रसारका लागि गंगाप्रसाद पौडेल र अध्यक्ष महेन्द्र राउतको संयोजकत्वमा आर्थिक व्यवस्थापन समिति गठन गरेको जिल्ला सचिव राजु खतिवडाले बताए । 
बैठकमा नेपाली काँग्रेस मकवानपुरका जिल्ला सचिव बुद्ध लामा, निवर्तमान सभापति रघुरमण न्यौपाने, पूर्व सभापति माइकल रामचन्द्र अर्याल, क्षेत्रीय सभापतिहरुसहित नेविसंघका पदाधिकारीको सहभागिता रहेको थियो । नेविसंघको केन्द्रिय अधिवेशन साउन २३ गतेदेखि काठमाण्डौंमा हुने जनाईएको छ ।