खेलकुद विकास समितिका १० योजना

१३ साउन, हेटौँडा । जिल्ला खेलकुद विकास समिति मकवानपुरले चालु आव २०७३/०७४ का लागि १० वटा कार्यक्रमलाई अघि सारेको छ । समितिले एक बर्षमा खेलकुद महोत्सव, प्रतियोगिता र सम्मान जस्ता योजना अघि सारेको हो ।
समितिले सातौं राष्ट्रिय खेलकुदको जिल्ला छनौट अन्तरगत खेलकुद महोत्सव गर्ने जनाएको छ । महोत्सवमा फुटवल, भलिबल, कराँते, तेक्वान्दो, क्रिकेट, उसु, बक्सिङ, फुल कन्ट्याक्ट कराँते, बुद्धिचाल, व्याडमिन्टन, टेबुलटेनिस, एथलेटिक्स समावेश हुने छन् । टि–२० राष्ट्रिय क्रिकेट प्रतियोगिताका लागि आवश्यक समन्वय गर्ने, राष्ट्रपति रनिङशिल्ड प्रतियोगिता गर्ने, हेटौँडा नगरकप फुटबल प्रतियोगिता गर्ने, राष्ट्रिय एवं अन्तराष्ट्रिय प्रतियोगितामा उत्कृष्ट प्रर्दशन गर्ने मकवानपुरले खेलाडिलाई सम्मान गर्ने योजना समेत समितिको रहेको अध्यक्ष माधव तिमल्सिनाले बताए । 
समितिले अन्तर जिल्ला तथा राष्ट्रिय प्रतियोगितामा खेलाडि सहभागी गराउने, खेल पत्रकारलाई सम्मान, खेल मैदान मर्मत एवं निर्माण, खेलकुद मन्त्रालय र राष्ट्रिय खेलकुद परिषदका निर्धारित कार्यक्रम संचालन गर्ने र विभिन्न संघसंस्थाबाट हुने प्रतियोगितामा सहकार्य गर्ने योजना बनाएको छ ।