हाँडिखोला स्वास्थ्य चौकीलाई एम्बुलेन्स हस्तान्तरण गरिने

१२ जेठ, हेटौंडा । मकवानपुरको हाँडीखोला स्वास्थ्यचौकीलाई जेठ २२ गते एम्बुलेन्स सहयोग हस्तान्तरण गरिने भएको छ ।

विभिन्न सहयोगीबाट संकलित रकमले केही हप्ताअघि ल्याइएको एम्बुलेन्स २२ गते एक कार्यक्रमकाबीच हाँडीखोला स्वास्थ्यचौकीलाई हस्तान्तरण गरिने भएको हो । एम्बुलेन्स हस्तान्तरणको लागि आवश्यक तयारी शुरू गरिसकेको हाँडीखोला एम्बुलेन्स व्यवस्थापन एवम् सञ्चालन समिति अध्यक्ष अर्जुन पुडासैनीले जानकारी दिए ।

मकवानपुर ओभरसिज नेटवर्कका संयोजक चिरञ्जिवी ढकालको संयोजकत्व एवम् हाँडीखोला प्रवासी समूहको विशेष अगुवाईमा एम्बुलेन्स सहयोग एवम् रकम संकलन अभियान शुरू भएको थियो । एम्बुलेन्स खरिद् प्रक्रिया केही महिनाअघि नै टुङ्गिएको भएपनि मन्त्रालयले एम्बुलेन्स खरिद् कार्यमा केही कडाई गरेको कारण एम्बुलेन्स ल्याउन ढिलो भएको बताइएको छ । स्थानीय जनताको सहभागितामा बृहत कार्यक्रम गरेर हाँडीखोला स्वास्थ्यचौकीलाई एम्बुलेन्स हस्तान्तरण गर्ने योजना रहेको मकवानपुर ओभरसिज नेटवर्कका संयोजक ढकालले जानकारी दिए ।

हेटौंडा उपमहानगरबाट नजिकै रहेर पनि स्वास्थ्यको दृष्टिकोणले निकै पछि परेको हाँडीखोलाका सर्वसाधारण जनताको स्वास्थ्य सेवामा सहयोग पुर्याउने उद्देश्यका साथ सुरु गरिएको यस अभियानलाई हाँडीखोला प्रवासी समूह र हाँडीखोलामै रहेका युवाहरुको सकृय साथ र सहयोग पाएको ढकालले बताए ।