११ न्यायाधीशद्वारा शपथ

१७ साउन, काठमाडौं । सर्वोच्च अदालतमा नवनियुक्त ११ जना न्यायाधीशले सपथ ग्रहण गरेका छन् । राष्ट्रपति कार्यालय शितल निवासमा  सोमबार उनीहरुले पद तथा गोपनीयताको सपथ ग्रहण गरेका हुन् ।
राष्ट्रपति बिद्या भण्डारीको उपस्थितिमा प्रधानन्यायाधीश सुशीला कार्कीले नवनियुक्त न्यायाधीशहरु दीपककुमार कार्की, केदारप्रसाद चालिसे, शारदाप्रसाद घिमिरे, मीरा खड्का, विश्वम्भरप्रसाद श्रेष्ठ, ईश्वरप्रसाद खतिवडा, अनिलकुमार सिन्हा, डा. आनन्दमोहन भट्टराई, हरिकृष्ण कार्की, प्रकाशमानसिंह राउत र सपना मल्ल प्रधानलाई  शपथग्रहण गराएकी छन् । न्यायपरिषद्ले गत फागुन १८ गते सर्वोच्च अदालतको न्यायाधीशमा सिफारिस गरेको ११ जनाको नाम संसदीय सुनुवाई विशेष समितिले आइतबार सर्वसम्मत अनुमोदन गरेपछि राष्ट्रपति भण्डारीले सोमबार नियुक्त गरेकी हुन् । सर्वोच्चमा न्यायाधीशको संख्या तीन महिलासहित २० पुगेको छ ।

शपथ ग्रहण समारोहमा उपराष्ट्रपति नन्दबहादुर  पुन, प्रधानमन्त्री केपी शर्मा ओली, सभामुख ओनसरी घर्ती, संवैधानिक अङ्गका प्रमुखहरु, मुख्यसचिव डा. सोमलाल सुवेदी, महान्यायाधिवक्ता हरि फुयाँल, सर्वोच्च अदालतका न्यायाधीशहरु, पुनरावेदन अदालतका न्यायाधीशहरु, नेपाल सरकारका सचिवहरु र सुरक्षा निकायका प्रमुखहरुको उपस्थिति थियो ।