अनुगमनको विरोधमा हेटौंडाका मेडिकल बन्द

सुनिल शिवाकोटी

८ असार, हेटौँडा । स्वास्थ्य मन्त्रालय अन्तरगतको औषधी व्यवस्था विभाग र आपूर्ति महाशाखाले अनुगमन गरेको विरोधमा हेटौँडाका मेडिकल तथा फार्मेसी बन्द गरिएका छन् ।

विहिबार दिउसो विभाग, महाशाखा र जिल्ला प्रशासन कार्यालय मकवानपुरले संयुक्त अनुगमनका क्रममा दुःख दिएको भन्दै उनीहरुले मेडिकल तथा फार्मेसी बन्द गरेका हुन् । अनुगमन टोलीले रामजानकी मेडिकल हल र उपकार मेडिकल हलमा शिलबन्दी गरेको छ । कानूनी प्रक्रिया नपुगेको भन्दै दुई मेडिकलमा शिल गरिएको जनाईएको छ । अनुगमन टोलीले लाईसेन्स प्राप्त व्यक्ति फार्मेसीमा बस्नुपर्ने, दर्ता र कर प्रक्रिया पुरा गरेको हुनपर्ने, मापदण्ड अनुसार क्लिनिक संचालन गर्नुपर्ने जस्ता सुझाव दिएको छ । विभागका शाखा अधिकृत निरोध घिमिरेको नेतृत्वमा आएको टोलीले बजारमा अनुगमन गरेको छ ।

दुई दिन अघि औषधी व्यवस्था विभाग बीरगंजबाट मात्रै अनुगमन भएको र दुःख दिने नियत अनुसार पुनः अनुगमन भएको भन्दै व्यवसायीहरुले विरोध गरेका छन् । क्लिनिक दर्ताका लागि स्वास्थ्य कार्यालय मकवानपुरमा प्रक्रियामा गईसकेको अवस्थामा मेडिकलहरुलाई हतोत्साही गर्ने काम हुनु बेठिक भएको नेपाल स्वास्थ्यकर्मी महासंघ निजि विभाग केन्द्रीय संयोजक उत्सव चौलागाईले बताए ।