मजदुर निलम्बनको विरोध

हेटौँडा, २० साउन । बहुराष्ट्रिय कम्पनी युनिलिभर नेपाल लिमिटेडले मजदुरलाई निलम्बन गरेको भन्दै ट्रेड युनियनले विरोध गरेको छ । उद्योगमा कार्यरत ७ मजदुरलाई निलम्बन गरेको भन्दै अन्तराष्ट्रिय ट्रेड युनियन महासंघ नेपाल आवद्ध जिल्ला परिषद मकवानपुरले विरोध गरेको छ ।

महासंघको टोलीले घटनाबारे मकवानपुरका प्रमुख जिल्ला अधिकारी डा. मानबहादुर विकको ध्यानाकर्षण गराएको छ । जिल्ला संयोजक कुमार पौडेलले ज्ञापनपत्र बुझाउँदै श्रम कार्यालय हेटौँडामा समस्या समाधानका लागि छलफल भईरहेको अवस्थामा कर्मचारीलाई निलम्बन गरिएकाले उद्योग व्यवस्थापक र कामदार प्रतिनिधिबीच भएको सहमति कार्यान्वयन र निलम्बनको निर्णय फिर्ता हुनुपर्ने माग गरे । टोलीमा नेपाल ट्रेड युनियन काँग्रेसका पौडेल, नेपाल ट्रेड युनियन महासंघका श्याम श्रेष्ठ, अखिल नेपाल ट्रेड युनियन महासंघ मकवानपुरका गंगाप्रसाद पौडेल लगायतको सहभागिता रहेको थियो ।

उद्योगले लालकृष्ण प्याकुरेल, जयराम धिताल, उद्धव पहाडी, चित्तबहादुर विक, राम सापकोटा, चन्द्रप्रसाद सापकोटा र रविबाबु मल्ललाई २ दिन अघि निलम्बन गरिएको छ । मजदुरहरु र उद्योगमा रहेको श्रम सम्बन्ध समितिबीच जेठ १६ गते ३ बुँदे सहमति भएपनि कार्यान्वयन नभएको भन्दै उनीहरु २६ दिनदेखि धर्नामा थिए । उद्योग र मजदुरबीच हाउजिङ लोन सुचारु गर्नुपर्ने, लोन लिएर भुक्तानी गर्ने मजदुरले अवकाशका समय उक्त रकम फिर्ता पाउनुपर्ने र हाईजिङ फण्डमा रहेको ६५ करोड रुपैंयाबाट २ लाख रुपैँया अनुदान दिने सहमति भएको मजदुर संगठनको भनाई छ ।