सिमेन्ट उद्योगले वातावरणमा ध्यान दिएन : कटुवाल

१८ असार, हेटौंडा । मकवानपुर उद्योग बाणिज्य संघका बरिष्ठ उपाध्यक्ष कृष्ण कटुवालले सिमेन्ट उद्योगले वातावरणिय पक्षलाई ध्यान नदिएको बताएका छन् । 
मकवानपुर उद्योग वाणिज्य संघ र राष्ट्रिय योजना आयोगका प्रतिनिधिबीच आइतबार भएको सिमेन्ट उद्योग पहुँच मार्ग विषयक छलफलमा कटुवालले सिमेन्ट उद्योगले खानी प्रयोग गर्दा वातावरणीय प्रभावलाई ध्यान नदिएको भन्दै आयोगको ध्यानाकर्षण गराए । 
खानी क्षेत्रमा बनाईएका सडकले पहिरो, भू–क्षय, वन विनाश लगायतका विषयमा मद्धत गरेको भन्दै यसले खानी क्षेत्रका बस्ती जोखिममा पर्न सक्ने जस्ता विषय छलफलमा आएका थिए । छलफलमा सहभागीले स्थानीयबासीलाई योग्यता अनुसार माथिल्लो तहसम्म रोजगारी दिन उद्योग व्यवस्थापनले तत्परता देखाउने नगरेको जनाईएको थियो । 
छलफलमा जिल्ला समन्वय समितिका सामाजिक विकास अधिकृत रामकृष्ण थापाले उद्योगले सामाजिक उत्तरदायित्वमा ध्यान दिनुपर्नेमा जोड दिएका थिए । घरेलु तथा साना उद्योग कार्यालयका निमित्त प्रमुख चन्दन कुमार अमात्यले उद्योगहरुले कानूनीरुपमा मापदण्ड पूरा गरेको वा नगरेको विषयमा अनुगमन आवश्यकता रहेको बताए । 
आयोगका उपसचिव चित्राङ्गत बरालले उद्योगहरुका लागि बनाईएका सडकहरुको अवस्था र यसले पारेको प्रभावका विषयमा प्रतिवेदन तयार गर्ने बताएका थिए ।