'सांसद बानियाँ राज्यमन्त्री बन्ने पक्का'

२६ साउन, हेटौँडा । नेकपा माओवादी केन्द्रका अध्यक्ष पुष्पकमल दाहालको नेतृत्वको सरकारमा सांसद इन्द्र बानियाँ राज्य मन्त्री हुने लगभग पक्कापक्की भएको एक दैनिकले खबर बनाएको छ । 

मकवानपुर क्षेत्र न.१ का निर्वाचित सांसद बानियाँलाई मन्त्री बनाउन पाटी सभापति शेरबहादुर देउवा,वरिष्ठ नेता रामचन्द्र पौडेल र तेस्रो धारको बलियो नेतृत्व गरेका खुमबहादुर खड्का लगाएत नेताहरू सकारात्मक भएपछि बानियाँ राज्य मन्त्री हुने भएको सेतीमादी दैनिकले खबर बनाएको हो । 'मकवानपुर जिल्ला देखि देश भरि नै लोकप्रिय रहेका बानियाँ कांग्रेस वृत्त भित्र राम्रो प्रभाव रहने नेताका रूपमा चिनिन्छन् ।'-दैनिकले समाचारमा उल्लेख गरेको छ । 

काँग्रेसको तर्फबाट बानियाँलाई मन्त्री बनाउन काँग्रेस जिल्ला सचिव बुद्ध लामा, कोषाध्यक्ष गोपिलाल विक, ४ जना क्षेत्रीय सभापति, निवर्तमान सभापति रघुरमण न्यौपाने, पूर्व सभापति माइकल रामचन्द्र अर्याल, संविधानसभा क्षेत्र नम्बर २ का उम्मेदवार एवं जिल्ला सदस्य जयराम लामिछानेसहितको टोलीले नेताहरुलाई केही दिन अघि भेटघाट गरेका थिए । उनीहरुले सभापति शेरबहादुर देउवा र  बरिष्ठ नेता रामचन्द्र पौडेललाई मकवानपुरे काँग्रेसको सान बढाएको र लाल किल्लाको रुपमा चिनिने मकवानपुरमा खाता खोलेको भन्दै बानियाँलाई मन्त्री बनाउन आग्रह गरेका थिए ।

बानियाँलाई मन्त्री बनाउनुपर्छ भन्नेमा जिल्ला तह मात्रै नभई यसअघि मन्त्री भईसकेका केन्द्रिय नेताहरु समेत लागि परेकाले उहाँको सम्भावना राम्रो रहेको बानियाँ निकट मानिने क्षेत्रीय सभापति दामोदर खनालले बताए । तर आकांक्षी हुँदा रहेकाले सभापति देउवालाई मन्त्री चयन गर्न हम्मे हम्मे परेकाले बानियाँ राज्य मन्त्री बन्ने निश्चित भई नसकेको स्रोतको दावि छ ।