मिल्यो नेविसंघ विवाद

२६ साउन, काठमाडौं । नेपाली काँग्रेसको भातृसंगठन नेपाल विद्यार्थी संघको प्रतिनीधि विवाद मिलेको छ । डा प्रकाश शरण महतको संयोजकत्वमा रहेको निर्देशक समितिको गएरातीको बैठकले विवाद मिलाएको हो । 

समितिले अनसनमा बसेको समुहको माग सुनुवाई गर्दै विवाद मिलाएको नेविसंघका प्रवक्ता युपी लामिछानेले जानकारी दिए । उनका अनुसार यसअघि माग गरिएको प्रतिनिधि संख्या र सबै पक्षका मागलाई राखेर मध्यमार्गीबाटोबाट प्याकेजमा समाधान खोजिएको छ । १३ जिल्लाको नेतृत्व खारेज गर्नु पर्ने मागबारे अब बन्ने केन्द्रीय समितिले अध्ययन गरेर गलत देखिए खारेज गर्ने सहमति भएको छ । ११ जिल्लाको सहभागिताका सन्दर्भमा छुटेका स्वभाविक नेताहरुलाई समावेश गर्ने समझदारी भएको छ । 

तीनदिन पछि बुधबार महाधिवेसनको बन्दसत्र सुरु हुँदैछ । बुधबार प्रतिनिधिहरुको सूची प्रकाशित गरिनेछ भने विहिबार नेतृत्व चयनका लागि निर्वाचन प्रक्रिया सुरु गर्ने तयारी छ । प्रतिनीधिको टुंगो नलाग्दा २३ गते सुरु भएको नेविसंघको११ औं महाधिवेशनको बन्दसत्र सुरु हुन सकेको थिएन । ३ हजार ४ सय महाधिवेशन प्रतिनिधि रहने भनिएको नेविसंको महाधिवेशनले १ सय ५५ सदस्यीय नयाँ कार्यसमिति चयन गर्नेछ ।