जिल्ला लिगमा बुधबार कुन टिमले जिते ?

तस्विरः बिक्रम बानिया

१४ भदौं, हेटौँडा । हेटौँडामा मंगलबारदेखि जारी जिल्ला लिग फुटवलमा बुधबार ४ खेल भएका छन् । लोकतान्त्रिक खेलमैदान हुप्रचौरमा विहान र दिउसो गरी ४ खेल सकिएका हुन् । 
मकवानपुर सिटी र जरुङ शक्ति सामुदायिक युवा क्लब हटियाबीचको खेलमा मकवानपुर सिटि ४–१ गोल अन्तरले विजयी भएको छ । सिटिको तर्फबाट बुद्धकुमार श्रेष्ठले १३ र २६ तथा विनोद राईले ३४ र ७० औं मिनेटमा गोल गरे भने जरुङको तर्फबाट विकास खत्रीले ६५ औं मिनेटमा गोल गरे । 
दोस्रो भएको हटिया स्पोर्टस क्लव र पदमपोखरी युथ क्लवबीचको खेलमा दुबै टिमले बराबरी १–१ गोल गरे । पदमपोखरीबाट आकाश लामा २३ औं मिनेटमा र हटियाबाट अर्जुन राईले ५२ मिनेटमा गोल गरे । 
तेस्रो खेलमा पशुपति युवा क्लब विजयी भएको छ । पशुपतिले हेटौंडा फुटबल एकेडेमीलाई १–० गोल अन्तरले पराजित गर्दा सञ्जय लामाले खेलका १२ औं मिनेटमा गोल गरे । विहानी क्लब हेटौँडा र निब्टा क्लब निबुवाटारबीचको खेलामा  विहानी क्लव ३–० गोल अन्तरले विजयी भयो । विहानीको तर्फबाट सुजन खड्गीले २१ औं मिनेट, ऋषिराम मोक्तानले ५५ र ६० औं मिनेटमा गोल गरेका थिए । ३७ टिमको सहभागिता रहेको प्रतियोगिताको बिजेताले नगद ५० हजार रुपैयाँ र उपबिजेताले नगद २५ हजार सहित शिल्ड, मेडल र प्रमाणपत्र पाउने छन् ।