राष्ट्रिय पुरुष भलिवलको तयारी तिब्र

१९ भदौं, हेटौँडा । बैशाख १२ गतेको भूकम्पमा परी निधन भएका राष्ट्रिय भलिवल प्रशिक्षक केशवलाल श्रेष्ठको स्मृतिमा भाद्र ३० गतेदेखि हेटौँडामा राष्ट्रिय पुरुष भलिवल प्रतियोगिता हुने भएको छ । प्रतियोगिताको तयारी तिब्र पारिएको जानकारी दिईएको छ ।
प्रतियोगिता केशवलाल श्रेष्ठ स्मृति केन्द्रीय प्रतिष्ठान मकवानपुर र युवा तथा खेलकुद समन्वय समिति हेटौंडा १९ बस्तिपुरको संयुक्त आयोजनामा हुने सोमबार आयोजित पत्रकार सम्मेलनमा जानकारी दिईएको थियो । हेटौँडा–१९ बस्तिपुरमा हुन लागेको प्रतियोगितामा नेपाली सेनाको त्रिभुवन आर्मी क्लव, नेपाल प्रहरी क्लव, सशस्त्र प्रहरी क्लव, ५ विकास क्षेत्रका १–१ टिम, आयोजक टिम र राष्ट्रिय क्लवहरु गरी १२ टिमको सहभागिता हुने कार्यक्रम संयोजक राजेश भेटवालले बताए । 
प्रतियोगितामा प्रथम पुरस्कार दुई लाख, द्धितीय पुरस्कार १ लाख, सेमिफाइनलमा पुग्ने टिमलाई ५० हजार, चौथो पुरस्कार २५ हजार, उत्कृष्ट खेलाडीको लागि १५ हजार रहेको छ । उत्कृष्ट स्पाइकर,  उत्कष्ट ब्लकर, उत्कष्ट डिफेन्ड, उत्कष्ट लिफ्टर, उत्कृष्ट लिवरो र अनुशासित टिमलाई ५–५ हजार रुपैँया पुरस्कार प्रदान गरिने जनाईएको छ । प्रतियोगितामा १८ लाख खर्च हुने आयोजकले जनाएको छ । 
पत्रकार सम्मेलन केशवलाल श्रेष्ठ स्मृति केन्द्रीय प्रतिष्ठान मकवानपुरका अध्यक्ष प्रताप बिष्टको अध्यक्षतामा भएको थियो ।