उपाधिको लागि निर्माण र प्रतिफल भिड्ने

गुगल तस्बिर

२६ भदौ, हेटौंडा । दिव्यतारा बहुउद्देश्यीय सहकारी संस्था लिमिटेडको आयोजना तथा रेडियो मकवानपुरको व्यवस्थापनमा मकवानपुरमा पहिलो पटक सञ्चालन भएको अन्तर सहकारी फुटसलको उपाधिको लागि निर्माण उपभोक्ता सहकारी र प्रतिफल बचत तथा ऋण सहकारी संस्था भिड्ने भएका छन् ।

सोमबार भएको पहिलो सेमिफाइनलमा प्रतिफलले नारायणी बहुउद्देश्यीय सहकारी संस्थालाई २–१ गोल अन्तरले हराएको हो । प्रतिफलको लागि सुमन भुजेल र सुवास रायमाझीले समान एक/एक गोल गरे भने नारायणीको तर्फबाट एक मात्र गोल स्यान्टो आचार्यले गरेका हुन् । बेलुका भएको अर्को सेमिफाइनल खेलमा निर्माण उपभोक्ता सहकारीले साइराम बचत तथा ऋण सहकारीलाई ४–१ गोल अन्तरले हराएको हो ।

निर्माणको जितमा राज शाहीले २ र आशिष मानन्धर तथा सशील देउलाले समान एक÷एक गोल गरेका हुन् । फाइनल खेल आज मङ्गलबार बिहान ८ बजे हुने प्रतियोगिताको व्यवस्थापक रेडियो मकवानपुरका स्टेशन संयोजक राममणि दाहालले जानकारी दिए । दिव्यतारा बहुउद्देश्यीय सहकारी संस्था लिमिटेडको बार्षिक साधारणसाभाको सन्दर्भमा पहिलो पटक आयोजना गरिएको अन्तर सहकारी फुटसलको विजेता र उपविजेता टिमले क्रमश : नगद १५ हजार र १० हजार रुपियाँसहित शिल्ड मेडल र प्रमाणपत्र प्राप्त गर्नेछ ।

प्रतियोगिताको विजेता टिमलाई असोज ८ गते हुने सहकारीको बार्षिक साधारणसभाको दिन पुरस्कार प्रदान गरिने आयोजक दिव्यतारा सहकारीका सचिव गणेशप्रसाद भेटवालले जानकारी दिए ।