नेविसंघको मतदान बुधबार

३२ साउन, काठमाडौं ।  मतदाता नामावलीबारे विवादका कारण लम्बिएको नेपाल विद्यार्थी संघको महाधिवेशनमा बुधबार मतदान हुने भएको छ । नेविसंघको चुनावी प्रक्रिया मंगलबार शुरु भएकाले बुधबार मतदान हुने भएको हो ।
निर्वाचन कार्यतालिका अनुसार मंगलबार बिहान ८ बजेदेखि मध्याह्न १२ बजेसम्म उम्मेदवारको मनोनयन दर्ता हुनेछ ।  उम्मेदवारको पहिलो नामावली प्रकाशन दिउँसो २ बजे हुनेछ । दिउँसो साढे २ बजेदेखि ३ बजेसम्म उम्मेदवारको नाम वर्णानुक्रम अनुसार भए नभएकोमा दावी संशोधन माग गर्ने समय रहने छ भने उम्मेदवारको नामावली दोस्रो पटक साढे ३ बजे प्रकाशन गरिनेछ । उम्मेदवारको मनोनयन पत्रमा दावी विरोधका लागि दिउँसो ३ देखि साढे ३ बजेसम्मको समय तोकिएको छ । दावी विरोध उपर जाँचबुझपछिको उम्मेदवारीको नामावली प्रकाशन अपरान्ह ४ बजे हुनेछ । उम्मेदवारीको नाम फिर्ताका लागि अपराह्न साढे ५ बजेसम्मको समय दिइएको छ । उम्मेदवारको अन्तिम नामावली प्रकाशन साँझ साढे ६ बजे हुनेछ ।
कार्यतालिका अनुसार बुधबार बिहान ७ बजेदेखि साँझ ७ बजेसम्म मतदान हुनेछ । मतदानका लागि नेपाली कांग्रेस केन्द्रीय कार्यालय वीपी नगर तय गरिएको छ । महाधिवेशन साउन २३ गतेबाट शुरु भएको थियो ।
अध्यक्षमा ८ जनाको उम्मेदवारी
नेविसंघको नेतृत्वका लागि ८ जनाको उम्मेदवारी परेको छ । अध्यक्षका लागि नैनसिंह महर, मनोजमणी आचार्य, शुभराम बस्नेत, नगेन्द्रसिंह ठकुरी, बच्चन कार्की, आनन्द त्रिपाठी , लक्ष्मण आचार्य र पदमराज पन्तले अध्यक्षमा उम्मेद्वारी दर्ता गराएको  निर्वाचन समितिले जनाएको छ । एक अध्यक्ष, ११ उपाध्यक्ष, २ महामन्त्री, १३ सहमहामन्त्री, एक कोषाध्यक्ष र १ सय १ जना सदस्यका लागि निर्वाचन हुने छ । नेविसंघको नयाँ बिधानअनुसार, १ सय ५१ सदस्यीय केन्द्रीय कमिटिमा १ सय २९ पदका लागि निर्वाचन हुनेछ ।