आयव्यय सार्वजनिकको माग गर्दै नयाँ शक्तिको ज्ञापनपत्र

१ भदौ, हेटौंडा । नयाँ शक्ति नेपाल मकवानपुरले आय व्यय सार्वजनिक गर्न माग गर्दै बुधबार मकवानपुरका स्थानिय निकायमा ज्ञापन पत्र बुझाएको छ । पार्टी संयोजक प्रल्हाद लामिछानेको नेतृत्वमा र्यालीसहित पुगेको टोलीले जिल्ला विकास समिति मकवानपुर र हेटौँडा उपमहानगरपालिकामा १५ दिनभित्र आयव्यय सार्वजनिक गर्न माग राख्दै ज्ञापनपत्र बुझाएको हो ।

टोलीले जिल्ला विकास समितिको कार्यालय मकवानपुरका निमित्त स्थानिय विकास अधिकारी निर्मल प्याकुरेललाई आर्थिक वर्ष ०५९/६० देखि ०७२/७३ सम्मको आयव्यय १५ दिन भित्र सार्वजनिक गर्न माग गर्दै ज्ञापन बुझायो । ज्ञापन पत्र बुझ्दै प्याकुरेलले आफुहरुले छिटो भन्दा छिटो माग गरेको सुचना विवरण सार्वजनिक गर्ने प्रतिवद्धता व्यक्त गरे । उनले आफुहरुले विभिन्न समयमा सूचना सार्वजनिक गरिरहेको दावि गर्दै नयाँ शक्तिको माग अनुसार फेरि पनि सार्वजनिक गर्न जिविस तयार रहेको बताए ।

टोलीले हेटौंडा उपमहानगरपालिकाका निमित्त कार्यकारी अधिकृत शंकर प्रसाद उपाध्यायलाई ज्ञापन पत्र बुझाएको छ । ज्ञापन पत्रमा माग गरिएको सुचना २०६४ सालसम्म हस्तलिखित भएकोले केहि समय लाग्ने र बाँकी वर्षका सूचना छिटै दिने प्रबन्धक विके महर्जनले बताए । कार्यक्रममा निमित्त कार्यकारी अधिकृत उपाध्यायले स्थानिय निकाय श्रोत परिचालन कार्यविधि अनुसार सञ्चालन भएको स्थानिय निकायको जानकारी गराउँदै माग अनुसारको सुचना जति सक्दो छिटो सार्वजनिक गर्ने प्रतिवद्धता व्यक्त गरे ।  हेटौंडामा सहसंयोजक ज्योति रायमाझि, विवेक वाइवा, जीवन मोक्तान लगायत जिल्ला सदस्यहरुको उपस्थिति रहेको थियो ।

थाहामा पनि ज्ञापन

कार्यक्रम अन्तर्गत मकवानपुरको उत्तरी क्षेत्र थाहा नगरपालिका कार्यालयमा पनि आयव्यय माग गर्दै ज्ञापन पत्र बुझाइएको नयाँ शक्ति नेपाल थाहा नगर संयोजक सुजन रायमाझिले बताए ।  रायमाझिले थाहा नगर पालिका कार्यालयका प्रमुख भिम परियारलाई ज्ञापन पत्र बुझाएको बताए । कार्यक्रममा नगरपालिकाको तर्फबाट अनिल लामिछाने तथा नयाँ शक्तिका २ नम्बर  क्षेत्र संयोजक इन्द्र श्रेष्ठ, किसन रायमाझी लगायतको सहभागिता रहेको थियो । २०५९ सालदेखि प्रतिनिधिविहिन हुँदा अराजगता बढेको र अपारदर्शिताको विषय उठिरहेकाले अभिया नेपालको संविधान २०७२, भाग ३ को धारा २७ मा रहको मौलिक अधिकार अन्तर्गत सूचना मागिएको संयोजक लामिछानेको भनाई छ ।