यातायातबाट ६ अस्थायी बाटो कायम

६ भदौं, हेटौँडा । यातायात व्यवस्था कार्यालय बीरगंजले मकवानपुरका ६ सडकलाई अस्थायी बाटो कायम गरेको छ । अञ्चल यातायात व्यवस्थापन समिति बीरगञ्जको भदौ ५ गतेको निर्णय अनुसार सवारी साधन संचालनका लागि अस्थायी बाटो कायम गर्ने निर्णय भएको हो । 
जिल्ला यातायात व्यवस्थापन समितिको जेठ ५ गतेको बैठकले ६ वटा सडकलाई अनुमतिका लागि बीरगंज पठाएको थियो । यातायातले फुर्केचौर–छतिवन–हात्तिसुँडे हुँदै फापरवारी हेटौँडा सडक, पालुङ डाँडाबास पकनी सडक, कुलेखानी चित्लाङ सडक, बिसखेल बज्रबाराही हुँदै कुन्छाल सडक, हेटौँडा ठिंगन (कान्तिराजपथ) सडक र चुनियाँ नामटार हुँदै भाल्टार सडकलाई अस्थायी बाटो कायम गरेको मकवानपुरका सहायक प्रमुख जिल्ला अधिकारी हरिप्रसाद पन्तले बताए । 
६ वटा सडक प्राविधिक अध्ययन गरी सडक सवारी चल्न योग्य भनि अस्थायी सडकका लागि सिफारिस भएका थिए । बाँकी सडक यकिन गरी प्राविधिक प्रतिवेदन पेश गर्न जिल्ला यातायात व्यवस्थापन समितिमा पेश गर्न निर्देशन दिईएको छ । अस्थायी बाटो कायम भएका सडकमा नियमानुसार इजाजत लिई यातायात संचालन गर्न यातायात व्यवसायीलाई आग्रह गरिएको छ । 
सहायक प्रजिअ पन्तद्वारा जारी विज्ञप्तिमा सवारी साधनमा क्षमता भन्दा बढि यात्रु नराख्न, मालवाहक सवारी साधनले क्षमता भन्दा बढि भारबहन नगर्न सरोकारवालालाई आग्रह गरिएको जनाईएको छ । सडक दुर्घटनालाई मध्यनजर गर्दै राष्ट्रिय लोकमार्ग र मूख्य मार्गहरुमा कुनै पनि कार्यक्रम आयोजना नगर्न समेत भनिएको छ ।