भारतमा एकै दिन सत्र हजारभन्दा बढी कोरोना संक्रमित थपिए

१७ असार, हेटौंडा । वितेको २४ घण्टाको समयावधीमा भारतमा कोरोना भाइरसबाट थप १७ हजार ७० संक्रमित थपिएको भारतको केन्द्रीय स्वास्थ्य तथा परिवार कल्याण मन्त्रालयले शुक्रबार जानकारी दिएको छ ।
हाल भारतमा कोरोनाका कुल संक्रमितको संख्या चार करोड ३४ लाख ६९ हजार २३४ पुगेको छ । पछिल्लो चौविस घण्टाको समयावधीमा कोरोना संक्रमणमा २३ को मृत्यु भएको पनि मन्त्रालयले जनाएको छ । कोरोना शुरु भएबाट हालसम्म यस महामाहरीको कारण पाँच लाख २५ हजार १३९ को मृत्यु भएको छ ।  
हाल भारतमा एक लाख सात हजार १८९ सक्रिय संक्रमित रहेका छन् । सक्रिय संक्रमित एक लाखभन्दा बढी भएको गत छ महिनायता हिजो दोस्रो दिन हो । पछिल्लो एक दिनमा १४ हजार ४१३ कोरोना भाइरसबाट संक्रमणमुक्त भएका छन् । योसँगै भारतमा अहिलेसम्म संक्रमणमुक्त भएकाले कुल संख्या चार करोड २८ लाख ३६ हजार ९०६ पुगेको छ । कोरोना भाइरस निको हुने यो दर ९८.६१ प्रतिशत रहेको छ । 
भारतमा सन् २०२१ को जनवरी १६ बाट कोरोना भाइरसविरुद्ध खोप अभियान शुरु भएको थियो । सो समयदेखि हालसम्म एक अर्व ९६ करोड ८४ लाख डोजभन्दा बढी खोप लगाइएको छ । यहाँ कोरोना संक्रमण शुरु भएबाट हालसम्म ८६ करोड भन्दा बढीको कोरोना भाइरस परीक्षण भएको बताइएको छ ।