आपसी समन्वयबाटै फाइदा : राजदुत रे

७ भदौ, हेटौँडा । नेपालका लागि भारतिय राजदुत रञ्जित रे ले आपसी समन्वयबाट मात्रै दुई छिमेकीलाई फाइदा पुग्ने बताएका छन् । मकवानपुर उद्योग वाणिज्य संघ पश्चिमी क्षेत्र समितिको संयोजनमा मनहरीमा भएको कार्यक्रममा बोल्दै राजदुत रे ले समन्वयका आधारमा अघि बढे दुबैलाई फाइदा पुग्ने बताएका हुन् । 
दुई छिमेकीले संयुक्त रुपमा विकासका कार्य अघि बढाएमा दुबैलाई फाइदा पुग्ने उनको भनाई थियो । उनले मनहरी लगायत मकवानपुरकै समग्र विकासमा भारतले सहयोग गर्ने प्रतिवद्धता समेत व्यक्त गरेका थिए । मनहरी बजार नजिकै रहेको चेपाङ बस्तिको अवलोकन गरेका रे ले चेपाङ समुदायको शिक्षा, रोजगारमा सघाउ पुर्याउने बताए ।

कार्यक्रममा महावाणिज्य दुतावासकी महावाणिज्यदुत अञ्जु रञ्जनले चेपाङ समुदायका लागि सीपमूलक शिक्षामा भारतले नेपाल सरकारसँग समन्वय गरी अघि बढ्ने बताईन् । रञ्जनले आगामी जनवरी २६ तारीखमा मनहरी क्षेत्रको लागि एम्बुलेन्स सहगोग गर्ने प्रतिबद्धता समेत व्यक्त गरिन् । मकवानपुर उद्योग बाणिज्य संघका अध्यक्ष राजकुमार न्यौपानेले भारत र नेपाल छिमेकी देश भएकाले दुबैले विकासमा हातेमालो गर्नुपर्ने बताए । कार्यक्रममा पश्चिमी क्षेत्र समितिका सभापति गोविन्द रिजाल, खेम चेपाङ, पत्रकार प्रताप विष्ट लगायतले मन्तव्य व्यक्त गरेका थिए ।