बजार अनुगमनबारे छलफल

११ भदौ, हेटौंडा । मकवानपुर उद्योग वाणिज्य संघले बजार अनुगमन सम्बन्धि छलफल तथा अन्तरक्रिया कार्यक्रम सम्पन्न गरेको छ । 
संघका अध्यक्ष राजकुमार न्यौपानेको अध्यक्षतामा सम्पन्न कार्यक्रममा जिल्ला प्रशासन कार्यालयका प्रशासकीय अधिकृत विष्णुकुमार महतले व्यवसायीले लेवल नलागेका, म्याद सकिएका वस्तु विक्री नगर्ने हो भने प्रशासनले अनुगमन नै गर्नु नपर्ने धारणा व्यक्त गरे । कार्यक्रममा घरेलु तथा साना उद्योग कार्यालयका प्रमुख पुष्कर भट्टराईले अनुगमन उपभोक्ताको हितका लागि हो भन्ने व्यवसायीले बुझ्नुपर्ने बताए । 
अन्तरक्रिया कार्यक्रममा क्षेत्रीय खाद्य तथा गुण नियन्त्रण कार्यालय, हेटौंडाका प्रमुख राजकुमार रिजालले अनुगमन बजार सुधारका लागि भएको र व्यवसायीले अनुगमन आउँदा गर्वका साथ विक्री गर्न राखिएका सामान देखाउन सक्ने वातावरण सिर्जना गर्न आग्रह गरे । हेटौंडा उपमहानगरपालिकाका कार्यकारी अधिकृत सुदेवकुमार पोखरेलले व्यवसायीले उपभोक्ताको हितलाई मनन गनुपर्नेमा जोड दिए । 
विभिन्न वस्तुगत संघ, व्यवसायीहरुको सहभागिता रहेको कार्यक्रममा व्यवसायीहरुले सबैलाई एउटै भाडोमा राखेर हेर्न नहुने र भन्सारबाटै न्युन विजकीकरणको समस्या शुरु हुनेतर्फ सरोकारवालाहरुको ध्यानाकर्षण गराएका थिए । कार्यक्रममा संघका उपाध्यक्ष कृष्ण अग्रवाल, महासचिव महेन्द्र राउत लगायतले संघले व्यवसायिक हितका गतिविधि निरन्तर गर्ने बताएका थिए ।