स्पेनिस ला लिगामा डिप्रोटिभो डि लाकोरुना विरुद्ध बार्सिलोनाको सानदार जित

३ पुष, हेटौँडा । स्पेनिस ला लिगा फुटबलको लिडर बार्सिलोनाले आइतबार रातिको खेलमा प्रभावशाली जित निकाल्दै ६ अंकको अग्रता कायम गरेको छ । घरेलु मैदानमा भएको खेलमा बार्सिलोनाले डिप्रोटिभो डि लाकोरुनालाई ४–० ले हराएको हो । 
बार्सिलोनाको जितमा लुइस स्वारेज र पाउलिन्होले दुई दुई गोल गरे । दुई गोल पहिलो हाफमा र थप दुई गोल दोस्रो हाफमा भएको हो । २९ औं मिनेटमा स्वारेजले गोल गर्दै बार्सिलोनालाई सुरुवाति अग्रता दिलाए । ४१ औं मिनेटमा पाउलिन्होले गोल गर्दै पहिलो हाफमा बार्सिलोनालाई २–० को अग्रता दिलाए । ४७ औं मिनेटमा स्वारेजले व्यक्तिगत दोस्रो गोल गरेपछि बार्सिलोनाको अग्रता ३–० मा पुग्यो । यस्तै ७५ औं मिनेटमा पाउलिन्होले व्यक्तिगत दोस्रो गोल गर्दै बार्सिलोनालाई ४–० को जित दिलाए ।
आइतबारको खेलमा स्टार स्ट्राइकर लियोनल मेस्सीले दुई गोलका लागि सहयोग गरे पनि गोल भने गर्न सकेनन् । मेस्सीले प्रहार गरेको बल तीनपटक बारमा लागेर फर्किएको थियो । यस्तै उनले पाएको एउटा पेनाल्टी पनि मिस गरेका थिए । 
जितपछि शीर्ष स्थानको बार्सिलोनाको १६ खेलबाट ४२ अंक भएको छ । बार्सिलोना दोस्रो स्थानको एथ्लेटिको मड्रिड भन्दा ६ अंकले अघि रहेको छ । एथ्लेटिको मड्रिडको ३६ तथा तेस्रो स्थानको भ्यालेन्सियाको ३४ अंक छ भने एक खेल कम खेलेको चौथो स्थानको रियल मड्रिडको ३१ अंक छ । 
आइतबारराति नै भएका अरु खेलमा जिरोनाले गेटाफे तथा भिल्लारियलले सेल्टा डि भिगोलाई समान १–० ले हराए । यस्तै लास पालमस र इस्पानियोलले २–२ को बराबरी खेल्दै अंक बाँडेका छन् ।
(एजेन्सी)