भीम विराग प्रतिष्ठानले शनिबार ११ जनालाई सम्मान गर्ने

१९ बैशाख, हेटौंडा । भीम विराग संगीत, साहित्य, कला प्रतिष्ठान नेपालले यही २२ गते शनिबार विभिन्न विधाका ११ जनालाई सम्मान गर्ने भएको छ । फरक विधामा ४ जनालाई राष्ट्रिय पुरस्कार र अन्य ७ जनालाई विभिन्न पुरस्कार तथा सम्मान प्रदान गर्न लागेको हो । 
यस वर्षबाट सुरु गर्न लागेको भीम विराग राष्ट्रिय साहित्य पुरस्कार सुनसरीका कुन्ता शर्मालाई, राष्ट्रिय संगीत पुरस्कार मकवानपुरका लाल श्रेष्ठलाई, राष्ट्रिय कला पुरस्कार मकवानपुरकै बि.एस.रानालाई र राष्ट्रिय पत्रकारिता पुरस्कार ललितपुरका जयदेव भट्टराईलाई प्रदान गरिने भएको छ । सबै पुरस्कारको राशी नगद २५ हजार रुपैयाँ रहेको छ । 
मुक्तिगोविन्द बैद्यले स्थापना गरेको १५ हजार राशीको तुलसीमाया–शिवकुमारी सृजनशील नारी पुरस्कार मकवानपुरका मञ्जु खराललाई, विन्दुगोविन्द गोर्खालीले स्थापना गरेको ७ हजार ५०० राशीको भीम–मथुरा बाल प्रतिभा पुरस्कार मकवानपुरका ईशान्तकुमार मिश्रलाई र आशिष श्रेष्ठले स्थापना गरेको १५ हजार राशीको शिला नारी पुरस्कार मकवानपुरका निरु मगरलाई प्रदान गर्ने निर्णय गरिएको प्रतिष्ठानका अध्यक्ष केशवलाल श्रेष्ठले जानकारी दिए । 
चुनु बानियाँले स्थापना गरेको २० हजार राशीको विजय बानियाँ स्मृति लोक संगीत पुरस्कार मकवानपुरकी लोक गायिका पम्फा थापा मगरलाई, रामबहादुर पाख्रीनले स्थापना गरेको १५ हजार राशीको चिनुकुमारी लामा स्मृति साहित्य पुरस्कार मकवानपुरे साहित्यकार आरआर चौलागाईंलाई, देवप्रसाद श्रेष्ठ र दीपकप्रसाद श्रेष्ठले स्थापना गरेको १० हजार राशीको मंगलादेवी स्मृति स्वास्थ्य सेवा पुरस्कार मकवानपुरका सीमा मिश्रलाई र रोशन सेन गुप्ताले स्थापना गरेको १० हजार राशीको अजित सेन गुप्ता भिन्न क्षमता पुरस्कार बाराकी शिक्षिका अन्जु धिताललाई प्रदान गरिने अध्यक्ष श्रेष्ठले बताए । 
वरिष्ठ कला साधक विरागको नाममा स्थापना गरिएको प्रतिष्ठानले वर्षेनी सम्मान तथा पुरस्कार वितरण कार्यक्रमको आयोजना गर्दै आएको छ । भीम विराग राष्ट्रिय साहित्य, संगीत, कला र पत्रकारिता पुरस्कारका लागि हेटौंडा उपमहानगरपालिकाले आर्थिक सहयोग गरेको हो । 
२२ गते शनिबार दिउँसो १ बजे पल्पसा प्याराडाइजमा विशेष सांगीतिक तथा साहित्यिक कार्यक्रमकाबीच पुरस्कार तथा सम्मान प्रदान गरिने प्रतिष्ठानका महासचिव छवि अनित्यले जानकारी दिए ।