नेपालद्वारा केन्या ३ विकेटले पराजित

२९ माघ, हेटौँडा । नामिवियामा जारी विश्व क्रिकेट लिग डिभिजन २ मा नेपालले केन्यालाई ३ विकेटले पराजित गरेको छ । यो जीतसँगै नेपालले सन् २०१८ को विश्वकप छनोट खेल्ने सम्भावना बलियो बनेको छ। 

सोमबार भएको चौथो खेलमा नेपालले केन्याले दिएको १७८ रनको लक्ष्य ३ विकेट बाँकी रहदै पुरा गरेको छ । नेपालका लागि रोहितकुमार पौडेलले सर्वाधिक ४७ रन बनाए। त्यस्तै कप्तान पारस खड्का र आरिफ शेखले ४२/४२ रन बनाए । शरद भेषवाकरले १९ रन बनाए । अन्य खेलाडीले दोहोरो अंक छुन सकेनन्। केन्याका लागि इबी रिंगाराले महत्वपूर्ण ३ विकेट लिए। उनले पारस खड्का र शरद भेषवाकरलाई आउट गरेका थिए।

एनएन ओडिम्बो, एनएम ओडिम्बो र एसओ एन्गोचेले १/१ विकेट लिए । नेपालका लागि महत्वपूर्ण इनिङ खेलेका रोहित भने रन आउट भए। नेपालका लागि सन्दीप लामिछानेले ५ विकेट लिएका थिए ।  केन्याका लागि आइए करिमले ४२ रन बनाए । ओबान्डाले ४१ रन बनाउँदा सीओ ओबूयाले २७ र ओडियाम्बोले २४ रन जोडे । एसओ एनगोचेले २३ रन बनाउँदा अन्य खेलाडीले भने दोहोरो अंक जोड्न सकेनन् । नेपालका लागि सन्दीप लामिछानेले ५ विकेट लिए । सोमपाल, शरद र वसन्तले १/१ विकेट लिए ।

नेपालले क्यानाडासँग बुधबार अन्तिम खेल खेल्नेछ ।