कैलाशको पर्यटकीय क्षेत्र बैकुण्ठमा होमस्टे संचालन गरिने

 २९ चैत, हेटौंडा। मकवानपुरको कैलाश गाउँपालिका वडा नम्बर २ बैकुण्ठमा होमस्टे सञ्चालन गरिने भएको छ । पर्यटकीय क्षेत्रको रुपमा विकास हुदै गरेको बैकुण्ठमा  होमस्टे सञ्चालन गर्न लागिएको  हो ।

उक्त क्षेत्रमा ऐतिहासिक र पर्यटकीय क्षेत्र रहुनका साथै जीपलाइन सेवा पनि सञ्चालनको अन्तिम चरणमा रहेकाले घुम्न आउने आन्तरिक तथा बाह्य पर्यटकका लागि खाना र आवासको सेवा पुग्ने हिसाबले होमस्टे सञ्चालन गरिने गाउँपालिकाका अध्यक्ष लोकबहादुर मुक्तानले बताएका छन् । 
होमस्टे सञ्चालनका लागि स्थानीयहरुले विभिन्न स्थानका होमस्टेको स्थलगत अवलोकन गरिनुका साथै तालिम समेत लिइसकेको अध्यक्ष मुक्तानले बताएका छन् । भौगोलिक विकटता रहेको कैलाशमा बैकुण्ठ क्षेत्रमा भने पर्यटकीय क्षेत्रको रुपमा विकास गरिदैँ लगिएको उनले बताए । धादिङ जिल्लाका साथै मकवानपुरको थाहा नगर र राक्सिराङ गाउँपालिकासँगको सिमानामा रहेको बैकुण्ठ र कैलाश क्षेत्रमा होमस्टे चाडैँ सञ्चालनमा आउने उनले बताए ।होमस्टे सञ्चालन गर्ने स्थानीयहरुले चार दिने स्थलगत अवलोकन गरेर फर्किए लगत्तै तीन दिने तालिम प्रदान गरिएको थियो । गाउँपालिकाबाट स्वीकृत तीन लाख बजेटमा १७ जना होमस्टे सञ्चालन गर्ने स्थानीय, वडा २ का वडाध्यक्ष राजेन्द्र घिसिङ, वडा सचिव नितेशकुमार यादव, गाउँपालिका उद्यम विकास शाखा प्रमुख प्रमिला अर्याल सहितको टोलीले स्याङ्जाको सिरुबारी होमस्टे, लमजुङको घलेगाउँ र गोरखाको वारपाक क्षेत्रका होमस्टेहरुको अवलोकन गरिएको वडा नम्बर २ का वडाध्यक्ष घिसिङले बताए । हामीले स्थलगत अवलोकन गर्यौ, अब आफ्नो गाउँठाउँमा स्रोत साधनले पुगेसम्म होमस्टे सञ्चालन गर्नेछौं, अध्यक्ष घिसिङले भने । 
अवलोकन पश्चात सोही बजेटबाट तीन दिने होमस्टे सम्बन्धी तालिम प्रदान गरिएको छ । चितवनका प्रशिक्षक टिकाराम पौडेलले १७ जनालाई तालिम प्रदान गरेका थिए । वडा कार्यालय छ्याङदुङमा तालिम भएको थियो । तालिममा होमस्टे सञ्चालनका लागि प्रयोग गरिने घरको सटावट, पाहुनाको स्वागत सत्कार, विदाई, ऐन नियम कानूनहरुबारे जानकारी गराइएको गाउँपालिका उद्यम विकास शाखा प्रमुख प्रमिला अर्यालले बताईन् । तालिम पश्चात सहभागिहरुलाई वडाकै विभिन्न घरहरुको फिल्ड भिजिट गराइएको उनले बताईन् ।