आफु खुशी भेटघाट गर्न काँग्रेस नेताहरुको सुझाव

९ साउन, काठमाण्डौं । नेपाली काँग्रेसका केन्द्रिय सदस्यहरुले सरकार गठनको समयमा आफु खुशी भेटघाट अघि नबढाउन पार्टीका नेताहरुलाई सुझाव दिएका छन् । विभिन्न नेताहरुले प्रधानमन्त्री केपि शर्मा ओलीलाई भेट गरेको भन्दै केन्द्रिय कार्यसमिति बैठकमा सहभागीहरुले यस्तो सुझाव दिएका हुन् ।

उनीहरुले प्रधानमन्त्री ओलीले दलका नेताहरुलाई एक्ला एक्लै भेटेर भट्काउने काम गरिरहेको भन्दै यस्तो गतिविधि नगर्द सुझाव दिएका थिए । उनीहरुले अविस्वासको प्रस्ताव र सरकार परिवर्तनमा कुनै संवैधानिक जटिलता नरहेको भन्दै एक भएर अघि बढ्ने समेत बताएका थिए । सभापति शेरबहादुर देउवा, कोषाध्यक्ष सितादेवी यादव, बरिष्ठ नेता रामचन्द्र पौडेलसहितका नेता सहभागी बैठकमा नेता कृष्णप्रसाद सिटौला, रामचन्द्र पौडेल र प्रकाशमान सिंहले प्रधानमन्त्री ओलीसँगको भेटमा भएका छलफलबारे अवगत गराएका थिए ।

बैठकमा सहभागी नेताहरुले चिकित्सा क्षेत्रको सुधारका लागि अनसनरत डा. गोविन्द केसीको स्वास्थ्य अवस्था गम्भिर हुँदै गएको प्रति सचेत हुँदै निकासका लागि पहल गर्न पार्टीलाई सुझाव दिएका थिए । बैठकमा नेताहरु महेश आर्चाय, सुजाता कोइराला, बालकृष्ण खाँड, प्रदीप गिरी, गठन थापा, ज्ञानेन्द्रबहादुर कार्की धारणा राखेका थिए ।