राक्सिराङमा चट्याङको पूर्व सूचना दिने यन्त्र जडान

१७ बैशाख, हेटौंडा । मकवानपुरको राक्सिराङ्ग गाउँपालिकामा चट्याङ्गको पूर्वसूचना दिने यन्त्र सेन्सर सहितको साइरन जडान  गरिएको छ ।
दक्षिण एसियामै पहिलोपटक सफल परीक्षणपछि यो यन्त्र राक्सिराङ गाउँपालिकामा जडान गरिएको साउथ एशियन लाइट्निङ नेटवर्कका अध्यक्ष तथा अनुसन्धानकर्ता श्रीराम शर्माले बताएका छन्।उक्त यन्त्र मंगलबार गाउँपालिकाको कार्यालय चैनपुरमा जडान गरिएको हो।
जडान गरिएको यन्त्रले आकाशमा विद्युतीय चार्जको अनुभूति गरेपछि १६ किलोमिटरको रेडियसभित्र चेतावनी दिन सक्ने शर्माले बताएका छन्। यसअघि नगरकोटमा सफल परीक्षण गरिएको  यो प्रणालीले चट्याङ्ग आउनुभन्दा करिब १६ मिनेटअघि पूर्वसूचना दिने र  सर्वसाधारणलाई सुरक्षित स्थानमा जानको लागि सन्देश प्रवाह गर्नेछ जनाइएको छ। जडान कार्यक्रममा बोल्दै 
गाउँपालिका अध्यक्ष राजकुमार मल्लले  चट्याङको हिसाबले राक्सिराङ्ग उच्च जोखिमयुक्त क्षेत्रमा पर्ने भएकाले यस  प्रविधिले जनधनको क्षति कम गराउन मदत गर्ने बताए। 
 
प्राविधिक टोलीले आगामी यथासिघ्र सबै साइरन यन्त्रहरू जडान सम्पन्न गरिने जनाएको छ । वडा नम्बर १ को राम्चे, वडा २ र ३ को भाट्टी, वडा ४ को वडा कार्यालय, वडा ५ को चैनपुरमा मुख्य सेन्सर सहितको साइरन, वडा ६ को सिलिङ्गेको विद्यालय भवन, वडा ७ को गर्लिङ, वडा ८ को पाङ्बुङ र वडा ९ को प्रहरी चौकी कन्द्राङमा साइरन प्रणाली राखिने जनाइएको छ ।