विश्वकप लिग-२: नेपालद्वारा स्कटल्यान्ड पराजित

२० जेठ, हेटौंडा । विश्वकप लिग-२ अन्तर्गत  स्कटल्यान्डमा सोमबारबाट सुरु भएको त्रिकोणात्मक एकदिवसीय खेलमा नेपालले घरेलु टोलीमाथि रोमाञ्चक जित हासिल गरेको छ । नेपालले सोमबार राति सम्पन्न खेलमा स्कटल्यान्डमाथि १ विकेटको रोमाञ्चक जित निकाल्दै महत्वपूर्ण २ अङ्क जोड्न सफल भयो ।
अन्तिम बलमा १ रन चाहिँदा मार्क वाटले वाइड बल फाल्न पुग्दा नेपाल विजयी भयो । स्कटल्यान्डलाई हराएसँगै नेपालका प्रशिक्षक स्टुआर्ट लले पनि प्रतियोगितामा विजयी सुरुवात गर्न सफल भए । जितपछि नेपाल युएइलाई पछि पार्दै १३ खेलबाट ८ अङ्क बनाएर सातौं स्थानमा उक्लिएको छ ।
टस हारेर पहिले ब्याटिङ गरेको स्कटल्यान्डले दिएको २ सय ९७ रनको लक्ष्य पछ्याएको नेपालले १ बल बाँकी हुँदा ९ विकेट गुमाएर लक्ष्य पुरा गर्यो । नेपालका लागि करण केसीले सर्वाधिक ६५ रनको अविजित इनिङ खेले । उनले ४१ बलमा ३ चौका र ४ छक्का प्रहार गरेका थिए ।
उनी बाहेक ओपनर कुशल भुर्तलले ४४ बलमा ११ चौकाको सहयोगमा ५३ रन बनाउँदा आसिफ शेख २० रनमा आउट भए । त्यस्तै भिम सार्की ४० रनमा आउट हुँदा कप्तान रोहित पौडेलले ३७ रन बनाएका थिए । यि बाहेक गुल्सन झाले ४२ रन बनाउँदा नवौं नम्बरमा ब्याटिङका लागि आएका करण केसीनै जितका लागि नायक सावित बनेका थिए । केसी र झा बिच आठौं विकेटका लागि ६० रनको साझेदारी गरेका थियो । स्कटल्यान्डका ब्रान्डन म्याकमुलनले ३ विकेट लिएपनि टिमको हार टार्न सकेनन् । उनी बाहेक ज्या जार्भीस र माइकल लिस्कले समान २-२ विकेट लिएका थिए ।
त्यसअघि टस हारेर पहिले ब्याटिङ गरेको स्कटल्यान्डले निर्धारित ५० ओभरमा ७ विकेट गुमाएर २ सय ९६ रन बनाएको थियो । स्कटल्यान्डको प्रतिस्पर्धात्मक स्कोरमा ओपनर चार्ली टियरले ७२ बलमा १२ चौका र १ छक्का प्रहार गर्दै ८० रन जोड्दा फिनाली म्याक्राथले ५५ रनको अर्धशतकीय इनिङ्स खेले । त्यस्तै, म्याथ्यु क्रसले ३९ रन बनाउँदा माइकल लिस्कले १८ रन बनाएका थिए । मार्क वाटले १० रन बनाएका थिए ।
त्यस्तै, जर्ज मुन्सीले १२ रन बनाउँदा ब्रान्डन म्याकमुलन १९ रनमा पेभिलियन फर्किएका थिए। कप्तान रिची बेरिङ्गटन ४० रन बनाएर आउट भएका थिए। नेपालका लागि रिजन ढकाल, करण केसी, सोमपाल कामीले समान २-२ विकेट लिँदा सन्दीप लामिछानेले १ विकेट लिएका थिए ।