हेटौंडामा बागमती प्रदेश प्रहरी अस्पतालको भवन शिलान्यास

३१ असार, हेटौंडा। बागमती प्रदेश प्रहरी अस्पतालको शिलान्यास गरिएको छ।मंगलबार बिहान हेटौँडा उपमहानगरपालिका– १७ स्थित हटियामा बागमती प्रदेशस्तरीय प्रहरी अस्पतालको शिलान्यास गरिएको हो।

मंगलबार बिहान एक  कार्यक्रमका बीच प्रदेश सरकारका आन्तरिक मामिला तथा कानुनमन्त्री सुरजचन्द्र लामिछानेले अस्पतालको शिलान्यास गरेका हुन्।
शिलान्यास कार्यक्रममा बागमती प्रदेश प्रहरी कार्यालयमार्फत कार्यान्वयन हुने सो अस्पताल निर्माण योजनाअनुसार पहिलो चरणमा १५ शय्याको अस्पताल बनाइने जनाइएको छ । बागमती प्रदेश सरकारको कुल लागत आठ करोड तीन लाख ७१ हजार रुपैयाँ रहने अस्पतालको निर्माण कार्य आगामी ०८३ साल पुस १८ गतेभित्र सम्पन्न गर्ने लक्ष्य राखिएको छ। हाल हेटौंडा १५ रातोमाटे स्थित रातोमाटे गणबाट अस्पतालले प्रहरी कर्मचारीलाई मात्र सेवा दिदै आएको छ। हेटौंडा १७मा अस्पताल बनेपछि नागरिकपनि सेवा दिने अस्पतालका प्रमुख प्रहरी नायव उपरीक्षक डाक्टर प्रयास विडारीले जनाएका छन्।
यता सार्वजनिक सुरक्षा सुदृढीकरण र अपराध नियन्त्रणलाई थप प्रभावकारी बनाउन बागमती प्रदेश सरकारले प्रविधिमा आधारित निगरानी प्रणाली आजदेखि औपचारिक रूपमा सञ्चालनमा ल्याएको छ।प्रदेशका १० जिल्लामा जडान भएका सिसिटिभिको उदघाटन गरिएको हो।प्रदेशका आन्तरिक मामिला तथा कानुनमन्त्री सुरजचन्द्र लामिछानेले मंगलबार बिहान औपचारिक रूपमा उद्घाटन गरेका छन् । कार्यक्रममा मकवानपुरका प्रमुख जिल्ला अधिकारी स्किम श्रेष्ठ, बागमती प्रदेश प्रहरी प्रमुख डिआइजी अरुण पौडेल, पत्रकार महासंघ बागमती प्रदेशका अध्यक्ष कृष्ण सारू मगर, नेपाल पत्रकार महासंघ मकवानपुरका अध्यक्ष बालकृष्ण अधिकारी लगायतको उपस्थिति रहेको थियो।