पेलेर जाने मुडमा मूख्यमन्त्री लामा, मार्गप्रशस्त गर्न बानियाँको सुझाव

१३ साउन, हेटौंडा । नेपाली कांग्रेस संसदीय दलको हैसियतले मूख्यमन्त्री बनेका बहादुरसिंह लामा पेलेरै जाने मुडमा देखिएका छन् । मंगलबार नेपाली कांग्रेस बागमती प्रदेश संसदीय दलको नेताको हैसियत गुमेपनि मूख्यमन्त्रीको रूपमा भने पेलेरै अघि बढ्ने मुडमा देखिएका हुन् ।
संसदीय दलको नेता रहेका लामाविरूद्धको अविश्वासको प्रस्ताव बहुमतले पारित भएपछि उनले संचारकर्मीहरूलाई मूख्यमन्त्री नछाड्ने बताएका छन् ।  
उनले संसदीय दलको नेता आफू नरहेपनि मुख्यमन्त्री पदबाट राजीनामा दिनुपर्ने कुनै संवैधानिक बाध्यता नरहेको बताए । ‘सरकारको नेतृत्व एउटा पाटो हो, संसदीय दल अर्को पाटो हो । उनले गठबन्धन सरकारमा दलको नेता मुख्यमन्त्री बन्नुपर्ने कुनै बाध्यता नरहेको बताए । उनले आफुमाथि जालझेल र प्रपन्च रचिएको भन्दै त्यो जालो र दवावमा आफ्नै मन्त्रीहरू परेर राजिनामा दिएको बताए ।
तर कांग्रेस बागमती प्रदेश सभापति एवं प्रदेशसभा सदस्य ईन्द्रबहादुर बानियाँले भने लामाले अब मार्गप्रशस्त गर्नुपर्ने बताए । उनले लामा कांग्रेस संसदीय दलको नेताको हैसियतले मूख्यमन्त्री बनेको बताउँदै लामालाई मार्गप्रशस्त गर्न सुझाव दिए । संचारकर्मीहरूसंग कुरा गर्दै बानियाँले राजिनीतिमा ईमानदारिता, जिम्मेवारी र नैतिकता हुनेपर्ने भएकोले लामाले मार्गप्रशस्त गर्नु उचित हुने बताए । तर अहिले नै मूख्यमन्त्री छोड्न नपर्ने बताए । उनले पहिलो चरणमा अविश्वासको प्रस्तावबारे निर्णय भएको र दोस्रो चरणमा संसदीयको नेता चयनको काम कांग्रेस प्रदेश कार्यसमितिले गर्ने बताए । त्यसपछि सरकारबारे निर्णय हुने बानियाँले बताए । बानियाँले लामाको हैसियत 'काम चलाउ मूख्यमन्त्री' को भएको संकेत गरे । 'अहिलेसम्म उहाँ मूख्यमन्त्री हुनुहुन्छ तर अबका निर्णय विवेकपूर्ण ढंगले गर्नुपर्छ ।'
मूख्यमन्त्री समेत रहेका कांग्रेस संसदीय दलको नेता लामाविरूद्धको अविश्वासको प्रस्तावको पक्षमा २२ र विपक्षमा १५ सांसदले समर्थन गरेपछि उनले संसदीय दलको नेताको हैसियत गुमाएका छन् ।