मेयर कप फुटबलः ८ र १६ नम्बर वडा विजयी

२२ फागुन,हेटौडा । हेटौंडा उपमहानगरपालिकाको आयोजनामा हेटौंडा–४ स्थित लोकतान्त्रिक खेलकुद मैदान (हुप्रचौर) मा जारी तेस्रो मेयर कप फुटबल प्रतियोगिता अन्तर्गत मंगलबारको खेलमा ८ र १६ नम्बर वडा विजयी भएका छन् । मंगलबारको पहिलो खेलमा ८ नम्बर वडाले १७ नम्बर वडालाई ४–२ गोल अन्तरले हराएको हो । वडा नम्बर ८ को जितको लागी अस्मिर वाईबाले ३ र २७ औँ मिनेटमा दुई तथा सुमन थापाले ४९ र ५६ औं मिनेटमा २ गोल गरे । यसैगरी १७ नम्बर वडाको लागी अर्जुन राईले ४० र महेश गोङ्बाले ६१ औं मिनेटमा गोल गरे । खेलको म्यान अफ दी म्याच ८ नम्बर वडाका अस्मिर वाईबा भए उनले भ्वाइस अफ यूथ चौकीटोलको तर्फबाट नगद १ हजारसहित प्रमाणपत्र प्राप्त गरे । यस्तै मंगलबारनै भएको दोश्रो खेलमा १६ नम्बर वडा विजयी भयो । १६ नम्बर वडा र १३ नम्बर विच भएको खेल निर्धारित समयमा गोलरहित बराबरीमा टुङ्गिएपछि टाइब्रेकरको माध्यमबाट खेलको निर्णय लिइएका हो । टाइब्रेकरमा ४–३ गोल अन्तरले १६ नम्बर वडा विजयी भयो । १६ नम्बरका गगन शिलवाल, विश्वास सापकोटा, किरण चौलागाइँ र अजय सापकोटाको प्रहार गोल भएको थियो भने सुमन श्रेष्ठको प्रहार पोष्टमा लागेर फर्किएको थियो । यता पदमपोखरीको तर्फबाट रबि थिङ, विशाल थिङ र कमल गौतमको प्रहार मात्र गोल भयो । श्रीलाल स्याङ्तानको प्रहार आकाशिँदा नरेन्द्र गोलेको प्रहार १६ नम्बर वडाका गोलरक्षकले रोकेका थिए । खेलको म्यान अफ दी म्याच १६ नम्बरका डिफेण्डर गगन शिलवाल भए उनले भ्वाइस अफ यूथ चौकीटोलको तर्फबाट नगद १ हजारसहित प्रमाणपत्र प्राप्त गरे । जारी प्रतियोगितामा भोली बुधबार २ नम्बर वडा र ४ नम्बर वडाको बीचमा पहिलो खेल हुनेछ भने दोस्रो खेल १० नम्बर वडा र ३ नम्बर वडाको बीचमा हुने आयोजकले जनाएको छ ।