मेयर कप फुटबलः कुष्माण्ड र सत्य स्वरुप सेमीफाइनलमा 

फागुन २६, हेटौँडा । तेस्रो मेयर कप फुटबल प्रतियोगिता–२०७४ अन्तर्गत शनिबारको खेलबाट हेटौंडाको ९ नम्बर वडाको कुष्माण्ड फुटबल टिम र १६ नम्बर वडाको सत्य स्वरुप फुटबल टिम सेमीफाइनल प्रवेश गरेका छन् । 
शनिवार भएको पहिलो खेलमा कुष्माण्डले ८ नम्बर वडाको राजपानी फुटबल टिमलाई २–१ गोल अन्तरले हराउँदै सेमिफाइल प्रवेश गरेको हो । कुष्माण्डका लागि विशाल घलान ८ र ४० औँ मिनेटमा गरी दुई गोल गरे । यता राजपानीको तर्फबाट ३४ औं मिनेटमा अस्मिर वाइबाले एक मात्र सान्त्वना गोल फर्काए । 
खेलको म्यान अफ दी म्याच कुष्माण्ड टिमका विशाल घलान घोषित भए । उनले भ्वाइस अफ यूथ हेटौंडा चौकीटोलको तर्फबाट नगद १ हजार र म्यान अफ दी म्याचको प्रमाणपत्र प्राप्त गरे । 
यस्तै शनिवार नै सम्पन्न दोस्रो खेलमा १६ नम्बर वडाको सत्य स्वरुप फुटबल टिमले १२ नम्बर फुटबल टिमलाई हराउँदै सेमीफाइनलमा स्थान पक्का गरेको हो ।
 सत्य स्वरुपको जितको लागी खेलको १९ औं मिनेटमा रुपेश राना र ४६ औं मिनेटमा सुजन पाण्डेले १ ÷ १ गोल गरे । यस्तै १२ नम्बर फुटबल टिमक लागी एकमात्र गोल अमृत गोलेले गरे । 
दोश्रो खेलको म्यान अफ दी म्याच घोषित भएका १६ नम्बर वडाका रुपेश रानाले भ्वाइस अफ यूथ हेटौंडा चौकीटोलको तर्फबाट नगद १ हजार र म्यान अफ दी म्याचको प्रमाणपत्र प्राप्त गरे । 
यो संगै मेयर कप फुटबल प्रतियोगितामा सेमीफाइनल समीकरण पूरा भएको छ । 
भोली आईतबार फाइनल प्रवेशको लागि पहिलो खेलमा १० नम्बर वडाको भूटनदेवी टिम र १६ नम्बर वडाको सत्य स्वरुप टिम भिड्नेछ भने दोस्रो खेलमा २ नम्बर वडाको वनस्खण्डी फुटबल टिम र ९ नम्बर वडाको कुष्माण्ड सरोवर टिम भिड्नेछ ।