विशेष सतर्कता अपनाउन मुख्यमन्त्री बानियाँको अनुरोध

१८ असोज, हेटौंडा । बागमती प्रदेशका मुख्यमन्त्री इन्द्रबहादुर बानियाँले विशेष सतर्कता अपनाउन प्रदेशवासीलाई अनुरोध गरेका छन् ।
जल तथा मौसम विज्ञान विभाग (मौसम पूर्वानुमान महाशाखा) को पूर्वानुमान अनुसार असोज २० गतेसम्म बागमती प्रदेशभित्रका ठूला नदीनालाहरू लगायत अन्य प्रदेश हुँदै बागमती प्रदेश तर्फ बहने ठूला तथा तिनका सहायक नदीहरूमा बहाव उल्लेख्य बढ्ने र खतरा तह आसपास पुग्न सक्ने उच्च जोखिम रहेको उल्लेख गर्दै बानियाँले विपदमा विशेष सतर्कता अपनाउन, अत्यावश्यक काम बाहेक घर बाहिर ननिस्कन, आफ्नो बसोबासको क्षेत्र वरपर हुनसक्ने जोखिमबाट सतर्क रहन, लामो यात्रा नगर्न सम्पूर्ण प्रदेशवासीलाई अनुरोध गरेका छन् ।
यस प्रदेशका महाभारत, चुरे भई बहने स-साना नदीनालाहरूमा आकस्मिक बहावको सम्भावना रहेको, पहिरो जान सक्ने, डुबान हुन सक्नेसम्मको उच्च सम्भावना रहेको भन्दै अत्यावश्यक अवस्थामा सम्बन्धित स्थानीय तह तथा प्रदेश सरकारको विपद् जोखिम न्यूनीकरण तथा व्यवस्थापन महाशाखाको विपद् फोकल पर्सनलाई ९८५१२५३६२६ मा सम्पर्क गरी तथा सुरक्षाका अन्य सबै निकायहरूमा तत्काल जानकारी गराउन अनुरोध गरेका छन् ।
प्रदेश सरकारले जनधनको क्षति हुन नदिन तथा सम्भावित जोखिमलाई कम गर्न पूर्व तयारी गरेको र प्रदेश सरकार प्रमुखको हैसियतले उद्धार तथा राहतका लागि आवश्यक सुरक्षा लगायतका प्रबन्ध गर्न निर्देशन दिइसकिएको बानियाँले जनाएका छन् ।