कान्तिलोकपथ एकतर्फी सञ्चालनमा

एकतर्फी संचालन पछि गुडेका सवारी

२० असोज, हेटौंडा। अविरल वर्षाका कारण अवरुद्ध भएको हेटौँडा–काठमाडौं जोड्ने कान्ति लोकपथ  सञ्चालनमा आएको छ ।बकैया गाउँपालिका–११ घट्टेपाखा सिमात घुम्तीमा गएको ठूलो पहिरो पन्छाएपछि सोमबार दिउँसो ३ बजेबाट लोकपथ एकतर्फी सञ्चालनमा ल्याइएको हो ।

जिल्ला प्रशासन कार्यालय मकवानपुरका अनुसार साँझसम्म लोकपथ पूर्णरूपमा सञ्चालनमा आउने तयारी गरिएको छ । प्रमुख जिल्ला अधिकारी स्किम श्रेष्ठसहित सुरक्षाका प्रमुखहरू सोमबार बिहानै पहिरो प्रभावित क्षेत्रमा पुगेर अनुगमन र व्यवस्थापन कार्यमा संलग्न भएका थिए । 
गत शुक्रबार रातिदेखिको लगातार वर्षाले कान्ति लोकपथका विभिन्न ठाउँमा पहिरो खस्दा सडक अवरुद्ध भएको थियो। प्रशासनका अनुसार ठिंगनदेखि बगुवा खोलासम्म खसेका तीनवटा ठूला पहिरोहरू शुक्रबार नै पन्छाइएका थिए भने आज हेटौँडादेखि बगुवा खोलासम्मका साना–ठूला गरी आधा दर्जनभन्दा बढी पहिरोहरू पनि हटाइएका छन्।प्रमुख जिल्ला अधिकारी श्रेष्ठले हेटौँडाबाट काठमाडौं जोड्ने सबै मार्ग सञ्चालनमा आइसकेको जानकारी दिँदै जोखिम कायम रहेकोले चालकहरूलाई सतर्कता अपनाउन भनिएको बताइन । कान्ति लोकपथ सञ्चालनमा आएसँगै हेटौँडा–काठमाडौं आवतजावतमा सहजता आउने अपेक्षा गरिएको छ।