मकवानपुरमा प्रहरीमाथि बन्चरो प्रहार हुँदा हवाइफायर, २ जना पक्राउ

२८ फागुन,हेटौंडा । मकवानपुरको मनहरीमा प्रहरी माथि बन्चरो प्रहार भएको छ । 
बुधबार राति मनहरी गाउँपालिका–१ चकरी मकरी क्षेत्रमा लागुऔषध कारोबार भइरहेको छ भन्ने सूचनाको आधारमा प्रहरीचौकी पदमपोखरीबाट प्रहरी सहायक निरीक्षक दिल बहादुर तामाङ नेतृत्वको प्रहरी टोली घटनास्थल पुग्दा शनिश तितुङ सहितका अन्य व्यक्तिले अचानक बियरको बोतल र बन्चरो प्रयोग गरी प्रहरीमाथि आक्रमण  गरेका थिए। आक्रमणपछि प्रतिकारस्वरूप असई दिलबहादुर तामाङले आफुले बोकेको पेस्तोलबाट एक राउण्ड गोली चलाएको र उक्त गोली लागी तितुङ घाइते भएको मकवानपुर प्रहरीले जनाएको छ । 
घटना लगत्तै जिप्रकाबाट डिएसपी पुष्कर बोगटीको टोली घटनास्थल पुगेर  हेटौंडा १२ रमनटारका अन्दाजी २४ वर्षीय सन्जय जिम्बा ,सोही स्थान बस्ने अन्दाजी ३५ वर्षीय अजय थिङलाई नियन्त्रणमा लिएको डिएसपी बोगटीले बताएका छन्। 
घटनाका क्रममा तितुङले प्रहार गरेको बन्चरो लागेर असई तामाङको हातमा गम्भीर चोट लागेको जनाइएको छ । 
दुवै घाइतेलाई हेटौँडा ११ स्थित चुरेहिल अस्पताल ल्याइएको र गोली लागेका तितुङलाई थप उपचारका लागि चितवन मेडिकल कलेज भरतपुर पठाइएको जनाइएको छ । घाइते प्रहरी असई तामाङको चुरेहिल अस्पतालमै उपचार भइरहेको प्रहरीले जनाएको छ । 
घटनाबारे प्रहरीले थप अनुसन्धान भइरहेको मकवानपुरका सिडिओ वसन्त अधिकारीले जनाएका छन्।