‘कलानाथ अधिकारी व्यक्ति र कृति’ लोकार्पण

११ चैत, हेटौँडा । साहित्यकार एवं लेखक ह्यग्रिब आचार्यद्वारा लिखित पुस्तक ‘कलानाथ अधिकारी व्यक्ति र कृति’ आइतबार हेटौडामा लोकार्पण गरिएको छ । 
बरिष्ठ साहित्यकार तुल्सी थापा, कलानाथ अधिकारी स्मृति प्रतिष्ठान नेपालकी संरक्षक विश्वकान्ति कलावती सुमार्गी, अध्यक्ष अरुणराज सुमार्गी, लेखक आचार्य लगायतले संयुक्त रुपमा लोकार्पण गरेका हुन् । कबि, गायक एवं राजनितिकर्मी कलानाथ अधिकारीको २० औं स्मति दिवसको अवसरमा भएको कार्यक्रममा दुईजनालाई सम्मान समेत गरिएको थियो । कार्यक्रममा बर्ष २०७३ को कलानाथ अधिकारी स्रष्टा सम्मान डा. नारायणप्रसाद खनाल र २०७४ को कलानाथ अधिकारी स्रष्टा सम्मान बाबुराम पाण्डेलाई प्रदान गरिएको थियो । 
नगद ११ हजार १ सय ११ सहित सम्मानपत्रले खनाल र पाण्डेलाई प्रमुख अतिथि थापा र स्व कलानाथ अधिकारीका छोरी एवं प्रतिष्ठानकी संरक्षक बिश्वकान्ती कलावतीले संयुक्त रुपमा सम्मान गरेका थिए । कार्यक्रममा साहित्यकार रमेशमोहन अधिकारीले पुस्तकको समिक्षाका साथै कलानाथ अधिकारीको साहित्यिक योगदानबारे चर्चा गरेका थिए । 
प्रतिष्ठानका अध्यक्ष अरुणराज सुमार्गीको सभाध्यक्षतामा भएको कार्यक्रममा प्रतिष्ठानका सदस्य जज अधिकारी, सम्मानित पाण्डे र खनाल लगायतले मन्तव्य व्यक्त गरेका थिए ।