मुख्यमन्त्री बानियाँको अग्रगामी कदम: मन्त्रालय १४ बाट घटाएर ८ मात्रै

२२ बैशाख, हेटौंडा । बागमती प्रदेशमा मन्त्रालयको संख्या ८ रहने भएको छ । मंगलबार बसेको मुख्यमन्त्री इन्द्रबहादुर बानियाँ नेतृत्वको मन्त्रिपरिषद् बैठकले मन्त्रालय घटाएर ८ वटा कायम गर्न निर्णय गरेको हो ।
यसअघि रहेको १४ मन्त्रालय रहेकोमा साउन १ गतेदेखि ८ वटा मन्त्रालय रहने भएको छ ।
अब मुख्यमन्त्री तथा मन्त्रिपरिषद्को कार्यालयसहित आन्तरिक मामिला, कानुन तथा सहकारी मन्त्रालय, आर्थिक मामिला तथा योजना मन्त्रालय,  खानेपानी, ऊर्जा तथा सिँचाइ मन्त्रालय, भौतिक पूर्वाधार विकास मन्त्रालय, कृषि, पशुपन्छी, वन तथा वातावरण मन्त्रालय, स्वास्थ्य तथा सामाजिक विकास मन्त्रालय र उद्योग, पर्यटन, श्रम तथा यातायात मन्त्रालय कायम रहने सरकारका प्रवक्ता एवम् आर्थिक मामिला तथा योजना मन्त्री प्रभात तामाङले जानकारी दिए ।
असार १ गते आव २०८३/८४ का लागि आउने बजेटको पनि ८ वटा मन्त्रालयमार्फत नै आउने जनाइएको छ । तर असार मसान्तसम्म भने हालकै मन्त्रालय कायम रहनेछ ।
मन्त्रालय घटेसंगै कार्यालयहरूको सङ्ख्या १९८ बाट घटेर १४८ मा सिमित रहने र वार्षिक चालु खर्च करिब ५ अर्ब कम हुने अनुमान गरिएकाे छ । मन्त्रालय घटेसंगै ओएण्डएम सर्वे गरेर संगठन संरचना समेत एकिन गर्न समिति बनाइएको छ ।