डीपीएलमा काठमाडौं गोल्डेन्सको विजयी सुरुवात

१७ चैत्र, हेटौँडा । धनगढी प्रिमियर लिग क्रिकेटमा काठमाडौं गोल्डेन्सले विजयी सुरुवात गरेको छ । शनिबार कैलालीको धनगढीमा भएको उद्घाटन खेलमा टीम चौराहा धनगढीलाई ७ विकेटले हराउँदै काठमाडौंले विजयी सुरुवात गरेको हो । 
टस हारेर पहिले ब्याटिङ गरेको धनगढीले निर्धा्रित २० ओभरमा ६ विकेट गुमाएर १ सय ४५ रन बनायो । १ सय ४६ रनको मध्यम विजयी लक्ष्य काठमाडौं गोल्डेन्सले ८ बल बाँकी छँदै ३ विकेट गुमाएर पूरा गर्यो । 
राष्ट्रिय टोलीका उपकप्तान ज्ञानेन्द्र मल्लको कप्तानीमा रहेको काठमाडौंलाई जिताउन बलिङमा शाहब आलमले ह्याट्रिक गर्दा ब्याटिङतर्फ अमित श्रेष्ठले नटआउट ८१ र नरेश बुढाऐरले नटआउट २४ रनको योगदान दिए ।  
काठमाडौंलाई जिताउन अमित श्रेष्ठले नटआउट ८१ रनको अर्धशतकीय पाली खेले । ६५ बलको सामना गरेका उनले ९ चौका र ४ चौका प्रहार गरे उनी खेलको म्यान अफ् द म्याचसमेत बने ।
टस हारेर ब्याटिङ गरेको घरेलु टिम चौराहा धनगढीले उत्कृष्ट सुरुवात गरेको थियो । ५५ रनमा पहिलो विकेट गुमाएको उसले १ सय २६ रन जोड्दा मात्र २ विकेट गुमाएको थियो । उसका लागि ओपनर सुनिल धमालाले उत्कृष्ट पाली खेल्दै ६८ रन बनाए । तर १७ ओभरको तेश्रो बलमा शाहब आलमले धमलालाई आउट गरे । त्यसपछि लगातार चौथो र पाँचौ बलमा विकेट लिदै आलमले पहिलो खेलमा आफ्नो नाममा ‘ह्याट्रिक’ राखे । उनले धनगढीका कप्तान सोमपाल कामी र सोनु तामाङलाई शुन्य रनमै पेवेलियन फर्काएका थिए ।