बागमतीमा मुख्यमन्त्रीले घटाए मन्त्रालय, ८ कायम

१ साउन, हेटौंडा । बागमती प्रदेशमा ८ मन्त्रालय कायम भएको छ । प्रदेश सरकारले आजदेखि प्रदेशमा ८ मन्त्रालय कायम राखेको हो । 
मन्त्रालय घटाउने वैशाख २२ को निर्णय कार्यान्वयन गर्दै आजदेखि बागमती प्रदेशमा मुख्यमन्त्री तथा मन्त्रिपरिषद्को कार्यालयसहित आन्तरिक मामिला, कानुन तथा सहकारी मन्त्रालय, आर्थिक मामिला तथा योजना मन्त्रालय, खानेपानी, ऊर्जा तथा सिँचाइ मन्त्रालय, भौतिक पूर्वाधार विकास मन्त्रालय, कृषि, पशुपन्छी, वन तथा वातावरण मन्त्रालय, स्वास्थ्य तथा सामाजिक विकास मन्त्रालय र उद्योग, पर्यटन, श्रम तथा यातायात मन्त्रालय कायम भएका छन् । मुख्यमन्त्री इन्द्रबहादुर बानियाँले मन्त्रीको कार्यविभाजनसहित प्रदेश प्रमुख समक्ष सिफारिस गरेका छन् । 
कार्यविभाजन अनुसार मधुसुदन पौडेललाई कृषि, शिवराज अधिकारीलाई आन्तरिक, कन्चनचन्द्र बादेलाई स्वास्थ्य, डा. दिनेशचन्द्र देवकोटालाई भौतिक, प्रभात तामाङलाई आर्थिक, कृष्णकुमार तामाङलाई खानेपानी र विन्दु श्रेष्ठलाई उद्योग मन्त्री बनाएका छन् ।
त्यस्तै मुख्यमन्त्री बानियाँले किरण थापा मगर, उर्मिला नेपाल, भरत केसी, सुरेश श्रेष्ठ, जयराम थापा र विनु रायमाझी पौडेललाई सम्बन्धित मन्त्रालयमा अतिरिक्त जिम्मेवारी दिइएको छ । 
प्रदेश सरकारको नयाँ ओएनएम गरि मन्त्रालयगत प्रशासनिक विभाजन टुंग्याएर कर्मचारी समायोजन गर्नुपर्ने भएकाले यस अघिको मन्त्रालय संख्या अनुसार नै ६ जनालाई अतिरिक्त जिम्मेवारी दिइएको छ ।